અરવલ્લી જિલ્લાના મુખ્ય મથક મોડાસાના બાયપાસ સ્ટેટ હાઈવે પર આજે એકાએક આગની ઘટના બનતા ભારે ચકચાર મચી ગઈ હતી. મોડાસા બાયપાસ પર આવેલી યુનિટી હોસ્પિટલ નજીક એક મોપેડમાં અચાનક આગ ફાટી નીકળતા અફરાતફરી સર્જાઈ હતી. જોતજોતામાં આગે વિકરાળ સ્વરૂપ ધારણ કરી લેતા સ્ટેટ હાઈવે પરથી પસાર થતા વાહનચાલકોમાં પણ ફાળ પડી હતી.
ગેરેજ પર જતા જ આગ લાગી
ઘટનાની મળતી માહિતી અનુસાર, અરવલ્લી જિલ્લાના મોડાસા બાયપાસ સ્ટેટ હાઈવે પર સ્કૂટર સવાર યુવક પોતાનું વાહન લઈને જઈ રહ્યો હતો, ત્યારે અચાનક સ્કૂટરમાં કોઈ ખામી સર્જાતા તે બંધ પડી ગયું હતું. વાહન ચાલુ ન થતા ચાલકે તેને યુનિટી હોસ્પિટલ પાસે સુરક્ષિત રીતે સાઈડમાં પાર્ક કર્યું હતું. ત્યારબાદ ચાલક નજીકમાં આવેલા ગેરેજ પર મેકેનિકને બોલાવવા માટે ગયો હતો. હજુ તો ચાલક થોડે દૂર જ પહોંચ્યો હતો, ત્યાં જ પાર્ક કરેલા સ્કૂટરમાંથી એકાએક ધુમાડા નીકળવા લાગ્યા હતા અને જોતજોતામાં આગની જ્વાળાઓ ભભૂકી ઉઠી હતી.
