અમીરગઢ રેન્જના ખજુરિયા વિસ્તારમાંથી ગેરકાયદેસર રીતે કાપવામાં આવેલા અંદાજે 60 મણ ખેરના લાકડા ઝડપી લઈને જપ્ત કરી લેવામાં આવ્યા છે. અમીરગઢ વન વિભાગની ટીમ દ્વારા આ કાર્યવાહી કરવામાં આવી છે. ઇકબાલગઢ રાઉન્ડની ઝાંઝરવા બીટના વન રક્ષકને મળેલી બાતમીના આધારે ખજુરિયા ગામના માવભાઈ ભગાભાઈના સર્વે નંબરવાળા ખેતરમાં તપાસ કરવામાં આવી હતી. આ તપાસ દરમિયાન ખેરના લીલા વૃક્ષો કાપીને એકત્ર કરેલા મળી આવ્યા હતા.
વન વિભાગની પૂર્વ મંજૂરી લેવામાં આવી ન હોવાથી જપ્ત કરાયા
આ વૃક્ષો કાપવા માટે વન વિભાગની પૂર્વ મંજૂરી લેવામાં આવી ન હોવાથી અમીરગઢ રેન્જ દ્વારા સમગ્ર મુદ્દામાલ કબજે કરવામાં આવ્યો હતો. 25 નવેમ્બર, 2025ના રોજ વન રક્ષકને આ અંગેની બાતમી મળતા તેઓ સ્થળ પર પહોંચ્યા હતા.
