ભુજના રામનગરી વિસ્તારમાં લાંબા સમયથી દેશી દારૂનું વેચાણ થઈ રહ્યું હોવાની ફરિયાદો ઉઠી હતી. સ્થાનિક પોલીસ દ્વારા કોઈ નક્કર કાર્યવાહી ન થતા આખરે મહિલા કોંગ્રેસના કાર્યકરોએ મેદાનમાં આવવું પડ્યું હતું. મહિલા કાર્યકરોએ એકસાથે ત્રણ અલગ-અલગ પોઈન્ટ પર જનતા રેડ પાડીને ત્યાંથી દેશી દારૂનો તૈયાર જથ્થો તેમજ દારૂ બનાવવા માટે વપરાતો આથો ઝડપી પાડ્યો હતો.
પોલીસ મોડી પહોંચી
કોંગ્રેસ દ્વારા કરવામાં આવેલી આ આક્રમક કાર્યવાહી બાદ ભુજ બી-ડિવિઝન પોલીસનો કાફલો ઘટનાસ્થળે પહોંચ્યો હતો. મહિલા કાર્યકરોએ જે દારૂનો જથ્થો પકડી રાખ્યો હતો, તે પોલીસે કબ્જે કર્યો હતો. જોકે, આ ઘટનાને પગલે સ્થાનિક લોકોમાં એ ચર્ચાએ જોર પકડ્યું છે કે જે કામ પોલીસે કરવાનું હતું તે કામ મહિલાઓએ કરવું પડ્યું.
