રાજ્ય સરકાર દ્વારા વિધવા મહિલાઓના સન્માન અને સ્વાવલંબન માટે ચાલતી ‘ગંગા સ્વરૂપા આર્થિક સહાય યોજના’માં ટેકનોલોજીના માધ્યમથી મોટો બદલાવ કરવામાં આવ્યો છે. હવે લાભાર્થી બહેનોને સહાયની રકમ લેવા માટે પોસ્ટ ઓફિસ કે બેંકના ધક્કા ખાવા નહીં પડે. ઇન્ડિયા પોસ્ટ પેમેન્ટ્સ બેંક (IPPB) દ્વારા આ રકમ સીધી આધાર આધારિત DBT દ્વારા ખાતામાં જમા થશે અને પોસ્ટમેન ઘરે આવીને નાણાં પહોંચાડશે.
ઉત્તર ગુજરાતમાં વિશેષ અભિયાન
પોસ્ટ માસ્ટર જનરલ કૃષ્ણ કુમાર યાદવના જણાવ્યા અનુસાર, ઉત્તર ગુજરાતના અમદાવાદ, ગાંધીનગર, મહેસાણા સહિતના જિલ્લાઓમાં આશરે 1.47 લાખ લાભાર્થીઓ હાલ પોસ્ટ ઓફિસ દ્વારા સહાય મેળવે છે. આ તમામ બહેનોને આધુનિક બેંકિંગ સાથે જોડવા માટે 14 થી 20 ફેબ્રુઆરી, 2026 સુધી વિશેષ ઝુંબેશ ચલાવી નવા IPPB ખાતા ખોલવામાં આવશે.
