સાબરકાંઠા જિલ્લાના ધનસુરા-અમદાવાદ હાઈવે પર આજે એક હૃદયદ્રાવક ઘટના સામે આવી છે. રોજડ ચોકડી પાસે આવેલ પેટ્રોલ અને સીએનજી પંપ પર ગેસ ભરાવવા આવેલી એક ઈકો કારમાં અચાનક ભીષણ આગ ફાટી નીકળી હતી. જોતજોતામાં આગે એટલું વિકરાળ સ્વરૂપ ધારણ કર્યું હતું કે, સમગ્ર કાર બળીને ભસ્મીભૂત થઈ ગઈ હતી. સદનસીબે, આ ઘટનામાં કોઈ જાનહાનિ થઈ નથી, જેનાથી મોટી દુર્ઘટના ટળી છે.
પંપ પર મચી અફરાતફરી
ઘટનાની મળતી માહિતી અનુસાર, એક ઇકો કાર ચાલક રોજડ ચોકડી નજીક આવેલા પંપ પર સીએનજી પુરાવવા માટે આવ્યો હતો. આ દરમિયાન અચાનક ગાડીમાં શોર્ટ સર્કિટ અથવા અન્ય કોઈ ટેકનિકલ ખામીને કારણે આગ લાગી હતી. પેટ્રોલ પંપ જેવી સંવેદનશીલ જગ્યાએ આગ લાગતા જ ત્યાં હાજર લોકો અને પંપના કર્મચારીઓમાં ભારે નાસભાગ અને અફરાતફરીનો માહોલ સર્જાયો હતો.
જોતજોતામાં કાર બળીને ખાખ થઈ
આગની લપેટો એટલી ઝડપથી ફેલાઈ હતી કે, મિનિટોમાં જ આખી ઇકો કાર આગના ગોળામાં ફેરવાઈ ગઈ હતી. પંપ પર સુરક્ષાના સાધનો હોવા છતાં આગ એટલી ભયાનક હતી કે, તેને કાબૂમાં લેવી મુશ્કેલ બની હતી. આસપાસના લોકોના ટોળેટોળા ઘટના સ્થળે ઉમટી પડ્યા હતા. જોકે, કારમાં સવાર લોકો સમયસૂચકતા વાપરીને સમયસર બહાર નીકળી જતા મોટી જાનહાનિ ટળી હતી.
તંત્ર દ્વારા તપાસ
હાઈવે પર પંપ પાસે થયેલી આ ઘટનાને કારણે ટ્રાફિક જામના દ્રશ્યો પણ સર્જાયા હતા. આગ બુઝાયા બાદ કારના માત્ર લોખંડના હાડપિંજર જેવો જ અવશેષ બચ્યો હતો. આ ઘટના બાદ સીએનજી કિટમાં લીકેજ કે અન્ય કોઈ ક્ષતિ હતી કે કેમ તે અંગે સ્થાનિકોમાં ચર્ચા જાગી છે.
આ પણ વાંચો - Sabarkantha News: પ્રાંતિજમાં એન્ટી નાર્કોટિક્સ ટાસ્ક ફોર્સની મોટી કાર્યવાહી, 5 કિલોથી વધુ ગાંજાના જથ્થા સાથે એકની ધરપકડ
