દિલ્હી અને મુંબઈને જોડતા વ્યસ્ત હિંમતનગર-ચિલોડા નેશનલ હાઈવે 48 પર રાંધણ ગેસની ભયંકર અછત સર્જાતા હોટલ ઉદ્યોગ મુશ્કેલીમાં મુકાયો છે. કોમર્શિયલ ગેસ સિલિન્ડરનો પૂરતો પુરવઠો ન મળવાને કારણે હાઈવે પરની અનેક હોટલો અને રેસ્ટોરન્ટ્સના સંચાલકોએ મજબૂરીમાં પોતાના ધંધા-રોજગાર બંધ કરી તાળાબંધી કરવાની નોબત આવી છે. ગેસ વિના રસોડું ચલાવવું અશક્ય બનતા હાઈવે પરના ધમધમતા રસ્તાઓ હવે સુમસામ ભાસી રહ્યા છે.
વાહન ચાલકો સહિત રાહદારીઓને જમવા હાલાકી
આ પરિસ્થિતિને કારણે સૌથી મોટી અસર રોજગારી પર પડી છે. હોટલોમાં કામ કરતા સેંકડો પરપ્રાંતિય શ્રમિકો રાતોરાત બેરોજગાર બની ગયા છે. હોટલ સંચાલકો સામે હવે હોટલના મોંઘા ભાડા ચૂકવવા અને શ્રમિકોના પગાર કરવા એ મોટો પડકાર બની ગયો છે. બીજી તરફ, હાઈવે પરથી પસાર થતા હજારો વાહન ચાલકો અને રાહદારીઓને જમવા માટે ક્યાંય સુવિધા ન મળતા ભારે હાલાકીનો સામનો કરવો પડી રહ્યો છે.
