જૂનાગઢ શહેરના કચરાનો જ્યાં નિકાલ કરવામાં આવે છે તે ઈવનગર ડમ્પિંગ સાઈટ પર આજે અચાનક આગ લાગવાની ઘટના બની છે. ઉનાળાની શરૂઆત સાથે જ કચરાના વિશાળ ઢગલાઓમાં લાગેલી આ આગે જોતજોતામાં વિકરાળ સ્વરૂપ ધારણ કરી લીધું હતું, જેને પગલે સમગ્ર વિસ્તારમાં અફરાતફરીનો માહોલ સર્જાયો હતો.
ધુમાડાના ગોટેગોટા અને અફરાતફરી
ડમ્પિંગ સાઈટ પર પ્લાસ્ટિક અને અન્ય જ્વલનશીલ કચરો હોવાને કારણે આગ ઝડપથી પ્રસરી ગઈ હતી. આગ એટલી ભીષણ હતી કે તેના કાળા ધુમાડાના ગોટેગોટા કિલોમીટર દૂરથી પણ જોઈ શકાતા હતા, જેના કારણે આસપાસના રહીશોમાં ભયનો માહોલ ફેલાયો હતો. ઘટનાની જાણ થતા જ જૂનાગઢ મહાનગરપાલિકાની ફાયર બ્રિગેડની ટીમ તાત્કાલિક ઘટનાસ્થળે પહોંચી ગઈ હતી. ફાયરના જવાનોએ પાણીનો સતત મારો ચલાવીને આગને વધુ ફેલાતી અટકાવી હતી.
