કચ્છ જિલ્લાના રાપર તાલુકામાં બેલા ગામ નજીક એક આઇસર ટેમ્પોમાં અચાનક આગ ફાટી નીકળવાની ઘટના સામે આવી છે. ઘાસચારો ભરેલો આ ટેમ્પો રસ્તા પરથી પસાર થઈ રહ્યો હતો ત્યારે અચાનક લાગેલી આગને કારણે આસપાસના વિસ્તારમાં દોડધામ મચી ગઈ હતી. રાપરના બેલા પાસે આવેલા વિશાસર વાંઢની બાજુમાં સાંજના સાડા સાત વાગ્યાના સુમારે આ અકસ્માત સર્જાયો હતો. આઇસર ટેમ્પોમાં ઘાસચારો ભરેલો હોવાથી આગ જોતજોતામાં પ્રસરી ગઈ હતી અને આખાય ટેમ્પોને લપેટમાં લઈ લીધો હતો.
ઘાસચારો ભરેલા ટેમ્પોમાં લાગી આગ
અંધારાના સમયે આગની જ્વાળાઓ દૂર-દૂર સુધી દેખાઈ રહી હતી. આગ લાગતા જ સ્થાનિક લોકો મોટી સંખ્યામાં ઘટનાસ્થળે દોડી આવ્યા હતા. ટેમ્પોમાં લાગેલી આગ વધુ ન ફેલાય અને જાનહાનિ ન થાય તે માટે ગ્રામજનોએ ભારે જહેમત ઉઠાવી હતી. સ્થાનિક લોકોએ પાણીનો મારો ચલાવી અને અન્ય સાધનોની મદદથી આગ પર કાબૂ મેળવવા માટેના પ્રયાસો હાથ ધર્યા હતા.
