કચ્છના મુખ્ય મથક ભુજમાં છેલ્લા કેટલાક સમયથી પેટ્રોલ અને ડીઝલની અચાનક અછત સર્જાતા વાહનચાલકોમાં ભારે હાલાકી જોવા મળી રહી છે. ખાસ કરીને મિડલ ઈસ્ટમાં ચાલી રહેલા યુદ્ધની અસરો હવે સ્થાનિક સ્તરે ઈંધણ પુરવઠા પર પડતી હોય તેવું જણાઈ રહ્યું છે. ભુજના સ્ટેશન રોડ પર આવેલા બે મુખ્ય પેટ્રોલ પંપો ઈંધણ ખૂટી પડવાને કારણે બંધ કરી દેવાની ફરજ પડી છે.
પેટ્રોલ પંપો પર વાહનોની લાંબી લાઈનો
સ્ટેશન રોડ પરના પંપો બંધ થતાં તેની સીધી અસર શહેરના અન્ય વિસ્તારોમાં આવેલા પેટ્રોલ પંપો પર જોવા મળી રહી છે. અન્ય પંપો પર વહેલી સવારથી જ વાહનચાલકોની લાંબી લાઈનો લાગી છે. ટુ-વ્હીલરથી લઈને ફોર-વ્હીલર ચાલકો કલાકો સુધી લાઈનમાં ઉભા રહીને પેટ્રોલ ભરાવી રહ્યા છે. ઘણા કિસ્સામાં મર્યાદિત જથ્થામાં ઈંધણ આપવામાં આવતું હોવાથી લોકોમાં રોષની લાગણી પણ જોવા મળી છે.
