કચ્છ જિલ્લાના ઔદ્યોગિક હબ ગણાતા ગાંધીધામ શહેરમાંથી નશાના કાળા કારોબાર વિરુદ્ધ પોલીસે એક મોટી અને સફળ કાર્યવાહી કરી છે. ગાંધીધામ “બી” ડિવિઝન પોલીસે ચોક્કસ અને ખાનગી બાતમીના આધારે નશીલા પદાર્થોનું ગેરકાયદેસર વેચાણ કરતા એક શખ્સને મોટા પ્રમાણમાં ગાંજાના જથ્થા સાથે ઝડપી પાડ્યો છે. યુવાધનને બરબાદ કરતા ડ્રગ્સ અને નશાના દૂષણને ડામવા માટે કચ્છ પોલીસ દ્વારા આ ઓપરેશન પાર પાડવામાં આવ્યું છે.
સેક્ટર-7 ની પૂનમ સોસાયટીમાં દરોડો
પોલીસ સૂત્રો પાસેથી મળતી વિગતો અનુસાર, ગાંધીધામના સેક્ટર-7 વિસ્તારમાં આવેલી પૂનમ સોસાયટીમાં નશાકારક પદાર્થનો વેપલો ચાલી રહ્યો હોવાની બાતમી પોલીસને મળી હતી. જેના પગલે “બી” ડિવિઝન પોલીસની ટીમે આયોજનબદ્ધ રીતે સોસાયટીના કથિત અડ્ડા પર ઓચિંતો દરોડો પાડ્યો હતો. આ સર્ચ ઓપરેશન દરમિયાન પોલીસે સ્થળ પરથી અજય હિરજી સિંચણીયા નામના શખ્સને દબોચી લીધો હતો. આરોપીની તલાશી લેતા તેની પાસેથી 467.85 ગ્રામ ગેરકાયદેસર ગાંજાનો જથ્થો મળી આવ્યો હતો, જેને પોલીસે કબ્જે કર્યો છે.
