રાજ્યમાં કાળઝાળ ગરમી વચ્ચે કચ્છના વાતાવરણમાં અચાનક પલટો આવ્યો છે. સરહદી જિલ્લા કચ્છના મુખ્ય મથક ભુજ અને તેની આસપાસના વિસ્તારોમાં આજે કમોસમી વરસાદી ઝાપટાં થયા હતા. ખાસ કરીને અજરખપુર અને તેની આસપાસના ગ્રામ્ય વિસ્તારોમાં કરા સાથે વરસાદ પડતા લોકોમાં આશ્ચર્ય ફેલાયું હતું.
વાતાવરણમાં પ્રસરી ઠંડક
છેલ્લા કેટલાય દિવસોથી પડી રહેલી અસહ્ય ગરમી અને બફારા બાદ અચાનક આભ ફાટતા અને કરા પડતા વાતાવરણમાં એકાએક ઠંડક પ્રસરી ગઈ હતી. કમોસમી વરસાદને કારણે તાપમાનનો પારો ગગડ્યો છે, જેનાથી ગરમીથી અકળાયેલા લોકોને કામચલાઉ રાહત મળી છે.
