રાજકોટ-મોરબી હાઇવે પર અકસ્માતોનો સિલસિલો યથાવત રહ્યો છે. ટંકારા તાલુકાના હમીરપર ગામના પાટિયા પાસે આજે બે કાર વચ્ચે ભયાનક અકસ્માત સર્જાયો હતો. આ ઘટનામાં પંચ (Punch) અને વેગનઆર (WagonR) કાર સામસામે અથડાતા બંને વાહનોનો કચ્ચરઘાણ નીકળી ગયો હતો.
હમીરપર ગામના પાટિયા નજીક સર્જાયો અકસ્માત
આ અકસ્માત એટલો જોરદાર હતો કે બંને કારમાં સવાર મુસાફરોને ગંભીર ઈજાઓ પહોંચી હતી. પ્રાથમિક માહિતી મુજબ, કુલ 6 લોકોને નાની-મોટી ઈજાઓ થઈ છે. ઘટનાના પગલે આસપાસના લોકો મદદે દોડી આવ્યા હતા અને ઈજાગ્રસ્તોને તાત્કાલિક એમ્બ્યુલન્સ મારફતે નજીકના પડધરી ખાતે આવેલી હોસ્પિટલમાં સારવાર અર્થે ખસેડવામાં આવ્યા હતા.
