અરવલ્લી જિલ્લાના શામળાજી પાસે આવેલા અણસોલ ચેકપોસ્ટ નજીક આજે બે મોટરસાયકલ વચ્ચે સર્જાયેલા ભયાનક અકસ્માતમાં બે યુવકોએ જીવ ગુમાવ્યા છે. હોળી-ધૂળેટીના પવિત્ર તહેવાર નિમિત્તે પોતાના વતન જઈ રહેલા યુવકોના પરિવારમાં આ દુર્ઘટનાને પગલે શોકનું મોજું ફરી વળ્યું છે. નેશનલ હાઈવે પર આવેલી અણસોલ ચેકપોસ્ટ પાસેના સર્વિસ રોડ પર બે બાઇક સામસામે પૂરપાટ ઝડપે અથડાતા આ અકસ્માત સર્જાયો હતો.
હોળીનો તહેવાર હોવાથી યુવકો વતનમાં જતા હતા
ટક્કર એટલી જોરદાર હતી કે બંને બાઇક પર સવાર યુવકો રોડ પર ફંગોળાયા હતા. આ દુર્ઘટનામાં બે યુવકોના ઘટનાસ્થળે જ કરૂણ મોત નિપજ્યા હતા, જ્યારે અન્ય ચાર યુવકો ગંભીર રીતે ઇજાગ્રસ્ત થયા છે. ઇજાગ્રસ્તોની હાલત નાજુક હોવાથી મૃત્યુઆંક વધવાની પણ ભીતિ સેવાઈ રહી છે. આ યુવકો મજૂરી કે અન્ય કામકાજ અર્થે બહારગામ રહેતા હતા અને હોળીનો તહેવાર મનાવવા ઉત્સાહભેર પોતાના વતન પરત ફરી રહ્યા હતા.
