પંચમહાલ જિલ્લાના શહેરા તાલુકામાં આવેલા ખરેડિયા ગામ નજીક એક ગમખ્વાર માર્ગ અકસ્માત સર્જાયો હતો, જેમાં બે બાઇક સામસામે ટકરાતા એક યુવકનું ઘટનાસ્થળે જ કરૂણ મોત નીપજ્યું હતું, જ્યારે અન્ય બે વ્યક્તિઓને ગંભીર ઇજાઓ પહોંચી હતી. ઘટનાની મળતી માહિતી અનુસાર, શહેરાના ખરેડિયા ગામ પાસે બે મોટરસાયકલ વચ્ચે જોરદાર ટક્કર થઈ હતી. આ અકસ્માતમાં એક બાઇકના ચાલક ભારતભાઈ પટેલીયાનું માથામાં ગંભીર ઇજા થવાના કારણે ઘટનાસ્થળે જ મૃત્યુ થયું હતું.
બંને બાઇકને મોટું નુકસાન થયું
આ અકસ્માત એટલો ભયાનક હતો કે બંને બાઇકને મોટું નુકસાન થયું હતું. અકસ્માતમાં અન્ય બે વ્યક્તિઓને ગંભીર ઈજાઓ પહોંચી હતી. ઇજાગ્રસ્તોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા હતા. જોકે, એક ઇજાગ્રસ્ત યુવકને શરીરે વધુ ગંભીર ઇજાઓ પહોંચી હોવાને કારણે, તેને વધુ સારી સારવાર માટે તાત્કાલિક ગોધરાની હોસ્પિટલમાં રિફર કરવામાં આવ્યો હતો.
