રાજકોટ શહેર પોલીસ કમિશનરની સૂચના અનુસાર શહેરના સરહદી ગામો અને સીમ વિસ્તારોમાં ચાલતી ગેરકાયદેસર પ્રવૃત્તિઓ પર લગામ કસવા માટે એક ખાસ ડ્રાઈવનું આયોજન કરવામાં આવ્યું હતું. એરપોર્ટ પોલીસ સ્ટેશનનો સ્ટાફ અને SOGની ડ્રોન ટીમે સાથે મળીને ટેકનોલોજીના માધ્યમથી સઘન ચેકિંગ હાથ ધર્યું હતું.
ગુંદાળા, બારવણ અને બેડલાના સીમમાં ઓપરેશન
પોલીસની ટુકડીઓએ ખાસ કરીને ગુંદાળા, બારવણ અને બેડલા ગામના અંતરિયાળ સીમ વિસ્તારોને નિશાન બનાવ્યા હતા. આ વિસ્તારો ભૌગોલિક રીતે પથરાયેલા હોવાથી પગપાળા પેટ્રોલિંગમાં કેટલીક મર્યાદાઓ રહેતી હોય છે, જેના નિરાકરણ માટે ડ્રોન કેમેરાનો ઉપયોગ કરવામાં આવ્યો હતો.
ચેકિંગનો મુખ્ય હેતુ
આ આધુનિક સર્વેલન્સ મુખ્યત્વે ત્રણ પ્રકારના ગુનાઓ અટકાવવા માટે કરવામાં આવ્યું હતું. જેમાં સીમ વિસ્તારમાં છુપાવેલી દેશી દારૂની ભઠ્ઠીઓ કે વિદેશી દારૂના જથ્થાને શોધી કાઢવા, અંતરિયાળ વાડીઓ કે અવાવરૂ જગ્યાએ ચાલતા જુગારના અડ્ડાઓ પર નજર રાખવી અને નશીલા પદાર્થોની હેરાફેરી કે ગેરકાયદેસર ખેતી જેવી પ્રવૃત્તિઓ પર અંકુશ મેળવવા માટે આ સર્વેલન્સ હાથ ધરવામાં આવ્યું હતું.
ટેકનોલોજીનો સચોટ ઉપયોગ
ડ્રોન મારફતે આકાશમાંથી મેળવેલા જીવંત દ્રશ્યોના આધારે પોલીસે શંકાસ્પદ હિલચાલ ધરાવતી જગ્યાઓનું નિરીક્ષણ કર્યું હતું. આ પદ્ધતિથી પોલીસ ઓછા સમયમાં વિશાળ વિસ્તારને કવર કરી શકી હતી. આ ઓપરેશનથી અસામાજિક તત્વોમાં ફફડાટ વ્યાપી ગયો છે, કારણ કે હવે પોલીસની નજરથી બચવું મુશ્કેલ બન્યું છે. એરપોર્ટ પોલીસના જણાવ્યા અનુસાર, આગામી દિવસોમાં પણ આ પ્રકારે ડ્રોન સર્વેલન્સ ચાલુ રાખવામાં આવશે જેથી ગુનેગારોમાં કાયદાનો ભય જળવાઈ રહે અને નાગરિકો સુરક્ષિત અનુભવે.
ગુજરાતના વધુ સમાચાર વાંચવા માટે ક્લિક કરો
