રાજકોટ શહેરમાં સ્ટંટબાજોને પોલીસનો કોઈ ડર ન હોય તેમ ટ્રાફિક નિયમોના સરેઆમ ધજાગરા ઉડાડતી વધુ એક ઘટના સામે આવી છે. શહેરના વ્યસ્ત ગણાતા હોસ્પિટલ ચોક બ્રિજ પર એક યુવક દ્વારા કરવામાં આવેલો અત્યંત જોખમી અને ખતરનાક બાઈક સ્ટંટ કેમેરામાં કેદ થયો છે. આ વીડિયો સોશિયલ મીડિયા પર વાયરલ થતાં જ શહેરની ટ્રાફિક વ્યવસ્થા અને લોકોની સુરક્ષા સામે ગંભીર સવાલો ઊભા થયા છે.
હોસ્પિટલ ચોક બ્રિજ બન્યો સ્ટંટબાજોનો અડ્ડો
સ્થાનિક લોકોના જણાવ્યા અનુસાર, હોસ્પિટલ ચોક પાસે આવેલો ઓવરબ્રિજ હવે આવા નબીરાઓ અને સ્ટંટબાજો માટે જોખમી ખેલ કરવાનું મનપસંદ સ્થળ બની ગયો છે. વાયરલ વીડિયોમાં જોઈ શકાય છે કે ચાલુ ટ્રાફિક વચ્ચે એક યુવક પોતાના જીવના જોખમે અને અન્ય વાહનચાલકોની સુરક્ષાને નેવે મૂકીને બાઈક પર જોખમી કરતબો કરી રહ્યો છે. આ પહેલા પણ આ જ બ્રિજ પરથી અનેક વખત આવા બાઈક સવારોના સ્ટંટના દ્રશ્યો સામે આવી ચૂક્યા છે.
