રાજકોટ શહેરના વ્યસ્ત ગણાતા ગોંડલ રોડ પર આજે એક મોટી દુર્ઘટના ઘટતા રહી ગઈ હતી. ગુરૂકુળ બ્રિજ પાસે રોડ પર અચાનક ઓઇલ ઢોળાવાને કારણે રસ્તો અત્યંત ચીકણો બની ગયો હતો, જેના પરિણામે પસાર થઈ રહેલા વાહનચાલકો એકપછી એક સ્લીપ થવા લાગ્યા હતા. આ ઘટનામાં અંદાજે 8 થી 10 વાહનો પટકાયા હોવાનું સામે આવ્યું છે.
વાહનચાલકોમાં મચી ભાગદોડ
ગુરૂકુળ બ્રિજ પાસે અચાનક રોડ પર ઓઇલ ફેલાઈ જવાથી ટુ-વ્હીલર ચાલકોએ વાહન પરનો કાબૂ ગુમાવ્યો હતો. વાહનો સ્લીપ થવાને કારણે પાછળ આવતા અન્ય વાહનોમાં પણ અફરાતફરી મચી ગઈ હતી. પ્રત્યક્ષદર્શીઓના જણાવ્યા મુજબ, રસ્તો એટલો જોખમી બની ગયો હતો કે, બ્રેક મારતા જ વાહનો પલટી ખાઈ રહ્યા હતા.
