Surat News: સચિન વિસ્તારમાં બોગસ ડોક્ટર ઝડપાયો, પોલીસે સંજીત વિશ્વાસની કરી ધરપકડ

ડાયમંડ સિટી સુરતમાં વધુ એક બોગસ ડોક્ટરનો પર્દાફાશ થયો છે. સુરત શહેરના સચિન વિસ્તારમાં કોઈપણ ડિગ્રી વગર ક્લિનિક ખોલીને બેઠેલા અને લોકોના જીવ જોખમમાં મૂકતા બોગસ ડોક્ટરને પોલીસે દબોચી લીધો છે.

કોઈ પણ પ્રકારની માન્ય મેડિકલ ડિગ્રી વગર ચલાવતો હતો ક્લિનિક

ઘટનાની મળતી વિગતો અનુસાર, સુરત પોલીસને બાતમી મળી હતી કે, સચિન વિસ્તારમાં એક શખ્સ ડોક્ટર હોવાનો ડોળ કરી ક્લિનિક ચલાવી રહ્યો છે અને લોકોની સારવાર કરી રહ્યો છે. આ બાતમીના આધારે પોલીસે તપાસ કરતા સંજીત વિશ્વાસ નામનો શખ્સ કોઈ પણ પ્રકારની માન્ય મેડિકલ ડિગ્રી વગર ગેરકાયદેસર રીતે એલોપેથિક સારવાર આપતો હોવાનું બહાર આવ્યું હતું.

લોકોના સ્વાસ્થ્ય સાથે ચેડાં

આ બોગસ ડોક્ટર ગરીબ અને મધ્યમ વર્ગના લોકોની મજબૂરીનો ફાયદો ઉઠાવી તેમના સ્વાસ્થ્ય સાથે ગંભીર ચેડાં કરી રહ્યો હતો. ડિગ્રી વગર દવાઓ અને ઇન્જેક્શન આપી તે લોકોના જીવ જોખમમાં મૂકતો હતો. પોલીસે ક્લિનિક પર રેડ કરીને મેડિકલ સાધનો અને દવાઓનો જથ્થો જપ્ત કર્યો છે.

પોલીસ કાર્યવાહી

સચિન પોલીસે આરોપી સંજીત વિશ્વાસ વિરૂદ્ધ ગુનો નોંધી તેની ધરપકડ કરી છે. પોલીસ હવે એ દિશામાં તપાસ કરી રહી છે કે, આ શખ્સ કેટલા સમયથી આ ક્લિનિક ચલાવતો હતો અને તેની સાથે અન્ય કોઈ શખ્સો સામેલ છે કે કેમ. આ ઘટના બાદ આરોગ્ય વિભાગ પણ સતર્ક બન્યું છે અને બોગસ ડોક્ટર વિરૂદ્ધ કડક ઝુંબેશ ચલાવવાની તૈયારી કરી છે.

આ પણ વાંચો - Surat : બોરાસર પાટિયા પાસે ડિવાઈડર કૂદીને ઢોર અચાનક સામે આવતા મોપેડ સવાર બે લોકો પટકાયા