Surat News: વિદ્યાર્થીની અદ્ભુત કલા, PM મોદીને ભેટ આપી ખાસ પેઇન્ટિંગ

વડાપ્રધાન નરેન્દ્ર મોદીની સુરત મુલાકાત દરમિયાન એક અત્યંત પ્રેરણાદાયી અને ગૌરવપૂર્ણ ક્ષણ સામે આવી છે. સુરતમાં ધોરણ-12માં અભ્યાસ કરતા એક હોંશિયાર વિદ્યાર્થીએ પોતાની અનોખી કળાના દર્શન કરાવીને દેશના વડાપ્રધાન નરેન્દ્ર મોદીને તેમની જ એક ભવ્ય પેઇન્ટિંગ સ્મૃતિ ભેટ તરીકે આપી છે. વડાપ્રધાને પણ આ માસૂમ કલાકારની કલાની કદર કરીને ખુબ જ પ્રેમથી આ પેઇન્ટિંગનો સ્વીકાર કર્યો હતો.

3 વર્ષથી કરી રહ્યો હતો પ્રયાસ, આજે સપનું પૂરું થયું

વડાપ્રધાન મોદીને પોતાની કલા કૃતિ ભેટ આપનાર વિદ્યાર્થીએ ભાવુક થઈને જણાવ્યું કે, તે છેલ્લા ત્રણ વર્ષથી વડાપ્રધાન નરેન્દ્ર મોદીની આ છબી વાળી પેઇન્ટિંગ તેમને રૂબરૂ મળીને સ્મૃતિ ભેટ તરીકે આપવા માટે સતત પ્રયાસો કરી રહ્યો હતો. પરંતુ અગાઉ કોઈને કોઈ કારણોસર તેનો મેળ પડતો ન હતો. આજે આખરે તેની મહેનત અને આતુરતાનો અંત આવ્યો છે. વિદ્યાર્થીએ ગર્વ સાથે જણાવ્યું કે, આજે વડાપ્રધાન નરેન્દ્ર મોદીએ મારી પેઇન્ટિંગ સ્વીકારીને મને અને મારા પરિવારને ગૌરવિત કર્યો છે.

1 વર્ષની મહેનત અને 3x4 ની સાઈઝ

આ આકર્ષક પેઇન્ટિંગની ખાસિયત એ છે કે, તેને તૈયાર કરવામાં વિદ્યાર્થીને આખા એક વર્ષ જેટલો લાંબો સમય લાગ્યો છે. વિદ્યાર્થીએ ખૂબ જ ઝીણવટપૂર્વક અને ખંતથી વડાપ્રધાન મોદીની છબીને કેનવાસ પર ઉતારી છે. આ પેઇન્ટિંગ 3x4 સાઈઝનું છે, જે દેખાવમાં અત્યંત ભવ્ય લાગે છે. વડાપ્રધાન મોદીએ પણ આ વિદ્યાર્થીની મહેનત અને કલાના વખાણ કર્યા હતા અને તેને ઉજ્જવળ ભવિષ્ય માટે આશીર્વાદ આપ્યા હતા. આ ઘટના બાદ સોશિયલ મીડિયા પર પણ આ વિદ્યાર્થીની કલાના ભારે વખાણ થઈ રહ્યા છે.

આ પણ વાંચો - Surat News: નોટિસ વગર સાદા કપડાંમાં આવેલા લોકોએ 100 મકાનો તોડી પાડ્યા, રહીશોએ કર્યા ગંભીર આક્ષેપ