Suratમાં બ્રાન્ડેડના નામે નકલી વસ્તુઓ વેચતા નેટવર્ક પર રાંદેર પોલીસનો સપાટો; બે શખ્સોની કરી ધરપકડ

સુરત શહેરના રાંદેર વિસ્તારમાં કેટલાક સમયથી બ્રાન્ડેડ કંપનીના લોગો લગાવીને સસ્તામાં નકલી વસ્તુઓનું વેચાણ થઈ રહ્યું હોવાની માહિતી પોલીસને મળી હતી. રાંદેર પોલીસે આ મામલે સતર્કતા દાખવી ચોક્કસ લોકેશન પર રેડ કરી હતી. આ તપાસ દરમિયાન પોલીસને ત્યાંથી નામી કંપનીઓના માર્કા ધરાવતા પગરખાં, મોંઘીદાટ દેખાતી કાંડા ઘડિયાળો, સ્ટાઈલિશ ટી-શર્ટ અને ગોગલ્સનો મોટો સ્ટોક મળી આવ્યો હતો. આ તમામ વસ્તુઓ હકીકતમાં ડુપ્લિકેટ હોવાનું પ્રાથમિક તપાસમાં બહાર આવ્યું છે.

બે શખ્સોની ધરપકડ, મુદ્દામાલ જપ્ત

સુરત પોલીસે આ ગેરકાયદેસર વેચાણના નેટવર્ક સાથે જોડાયેલા બે ઈસમોની અટકાયત કરી છે. તેમની પાસેથી લાખોની કિંમતનો મુદ્દામાલ જપ્ત કરવામાં આવ્યો છે. પકડાયેલા આરોપીઓ આ ડુપ્લિકેટ માલ ક્યાંથી લાવતા હતા અને સુરતમાં અન્ય કોને કોને સપ્લાય કરતા હતા, તે દિશામાં હવે રાંદેર પોલીસે વધુ તપાસ હાથ ધરી છે.

ગ્રાહકોને છેતરવાનું મોટું નેટવર્ક?

સામાન્ય રીતે બ્રાન્ડેડ વસ્તુઓની કિંમત હજારોમાં હોય છે, પરંતુ આ શખ્સો ગ્રાહકોને આકર્ષવા માટે તે જ વસ્તુઓ ખૂબ જ સસ્તા ભાવે વેચતા હતા. આ પ્રકારના નકલી વેપારથી અસલી કંપનીઓને આર્થિક નુકસાન તો થાય જ છે, સાથે સાથે ગ્રાહકો પણ છેતરાય છે. સુરત પોલીસે ગ્રાહકોને પણ અપીલ કરી છે કે, ખૂબ જ સસ્તી મળતી બ્રાન્ડેડ વસ્તુઓની ગુણવત્તા તપાસીને જ ખરીદી કરવી.

ગુજરાતના વધુ સમાચાર વાંચવા માટે ક્લિક કરો