સુરત શહેરના શાંત ગણાતા અલથાણ વિસ્તારમાં તસ્કરોએ તરખાટ મચાવ્યો છે. ગત મોડી રાત્રે તસ્કરોએ એક મેડિકલ સ્ટોરને નિશાન બનાવીને હજારોની રોકડ રકમ પર હાથ સાફ કર્યો હતો. સમગ્ર ઘટનાની વિગતો મુજબ, અલથાણ વિસ્તારમાં આવેલી ‘હરિઓમ મેડિકલ એન્ડ ફાર્મસી’ માં ચોરીની ઘટના બની છે.
શટર તોડી અંદર પ્રવેશ્યા ત્રણ અજાણ્યા શખ્સો
મોડી રાત્રે જ્યારે બજાર સૂમસામ હતું, ત્યારે ત્રણ અજાણ્યા ઈસમોએ આ મેડિકલ સ્ટોરના શટરના તાળા તોડી અંદર પ્રવેશ કર્યો હતો. તસ્કરોએ દુકાનમાં ઘૂસીને કાઉન્ટર તેમજ ગલ્લામાં રાખેલી અંદાજે રૂપિયા 50,000ની રોકડ રકમ ચોરી લીધી હતી. ચોરીની આ સમગ્ર ઘટના દુકાનમાં લાગેલા CCTV કેમેરામાં કેદ થઈ ગઈ છે, જેમાં ત્રણ શખ્સો ચોરી કરતા સ્પષ્ટ નજરે પડે છે.
