ડાયમંડ સિટી સુરતના કાપોદ્રા વિસ્તારમાં આજે એક મોટી દુર્ઘટના ટળી છે. તરસાડી-સુરત રૂટની એસટી (ST) બસમાં અચાનક ભીષણ આગ ફાટી નીકળતા અફરાતફરી મચી ગઈ હતી. જે સમયે બસમાં આગ લાગી ત્યારે તેમાં 51 જેટલા મુસાફરો સવાર હતા, પરંતુ ડ્રાઈવરની સતર્કતા અને મુસાફરોની સમયસૂચકતાને કારણે તમામનો આબાદ બચાવ થયો છે.
આખી બસ આગની લપેટમાં આવી ગઈ
મળતી માહિતી મુજબ, રસ્તા પર જતી એસટી બસમાં કોઈ અગમ્ય કારણોસર એકાએક એન્જિનના ભાગેથી ધુમાડા નીકળવા લાગ્યા હતા અને જોતજોતામાં આખી બસ આગની લપેટમાં આવી ગઈ હતી. આગ લાગતાની સાથે જ મુસાફરો જીવ બચાવીને તાત્કાલિક બસમાંથી બહાર નીકળી ગયા હતા. જોકે, આગ એટલી વિકરાળ હતી કે જોતજોતામાં આખી બસ બળીને ખાખ થઈ ગઈ હતી.
