સાબરકાંઠા જિલ્લામાં જાણે અગ્નિદેવ કોપાયમાન થયા હોય તેમ આગ લાગવાની ઘટનાઓનો સિલસિલો યથાવત રહ્યો છે. આજે તલોદની વાવડી ચોકડીથી હરસોલ તરફ જતાં માર્ગ પર એક ટ્રક ટેલરમાં અચાનક ભીષણ આગ ફાટી નીકળી હતી. આ ઘટનાને પગલે હાઈવે પર દોડધામ મચી ગઈ હતી.
એન્જિનના ભાગમાં ભારે નુકસાન
ઘટનાની મળતી માહિતી અનુસાર, ચાલતી ટ્રક ટેલરમાં અચાનક શોર્ટ સર્કિટ અથવા અન્ય કોઈ ટેકનિકલ કારણોસર આગ લાગી હતી. જોતજોતામાં આગે વિકરાળ સ્વરૂપ ધારણ કરી લીધું હતું અને ટ્રકના એન્જિનના ભાગને લપેટમાં લઈ લીધો હતો. આગ એટલી ભીષણ હતી કે આકાશમાં કાળા ધુમાડાના ગોટેગોટા દૂર-દૂર સુધી જોઈ શકાતા હતા, જેના કારણે વાહનચાલકોમાં ભયનો માહોલ સર્જાયો હતો.
