ગાંધીનગર જિલ્લાના છત્રાલ જીઆઈડીસી નજીક વહેલી પરોઢે એક ગમખ્વાર અકસ્માત સર્જાયો હતો. પુરપાટ ઝડપે જઈ રહેલા ટ્રેલર અને આઇશર ટ્રક વચ્ચે થયેલી જોરદાર ટક્કરમાં એક વ્યક્તિનું ઘટના સ્થળે જ કરૂણ મોત નીપજ્યું છે. અકસ્માત એટલો ભયાનક હતો કે, વાહનોના કુરચા બોલી ગયા હતા. અકસ્માતના કારણે ટ્રાફિક જામના દ્રશ્યો સર્જાયા હતા.
વહેલી સવારે સર્જાયો અકસ્માત
ઘટનાની મળતી માહિતી અનુસાર, જ્યારે સમગ્ર પંથક ગાઢ નિદ્રામાં હતો, ત્યારે છત્રાલ હાઇવે પર આ અકસ્માત સર્જાયો હતો. અંધારામાં વાહનોની સ્પીડ વધુ હોવાથી ચાલકે કાબૂ ગુમાવ્યો હોવાનું પ્રાથમિક દ્રષ્ટિએ જણાઈ રહ્યું છે. ધડાકાભેર થયેલા અવાજને પગલે આસપાસના લોકો દોડી આવ્યા હતા અને પોલીસને જાણ કરી હતી.
