વડોદરા શહેરમાં નશાના કારોબાર સામે લાલ આંખ કરતી પોલીસે પાણીગેટ વિસ્તારના બાવામાનપુરા ખાતે બાતમીના આધારે રેડ કરીને ચરસના વેચાણના મોટા નેટવર્કનો પર્દાફાશ કર્યો છે. આ કેસમાં પોલીસે જાણીતા રીઢા આરોપી ફૈઝલખાન ઉર્ફે લાલો ચિલ્લર અને તેની ગુનાહિત પ્રવૃત્તિમાં સાથ આપનાર મહિલા હમીદાબીબીની અટકાયત કરી કાયદેસરની કાર્યવાહી હાથ ધરી છે.
ગુનાની મોડસ ઓપરેન્ડી
પોલીસ તપાસમાં બહાર આવ્યું છે કે, પાણીગેટ બાવામાનપુરામાં રહેતો ફૈઝલખાન ઉર્ફે લાલો ચિલ્લર હૈદરખાન પઠાણ લાંબા સમયથી માદક દ્રવ્યોના વેચાણ સાથે સંકળાયેલો છે. પોતાની ગેરકાયદેસર પ્રવૃત્તિઓ પર પોલીસની નજર ન પડે તે માટે તેણે એક અનોખી તરકીબ અપનાવી હતી. તેણે પોતાના ઘરને બદલે નજીકમાં રહેતી હમીદાબીબી અહેમદમીયા બીલીમના ઘરમાં ચરસનો જથ્થો છુપાવ્યો હતો. આ મહિલાના ઘરનો ઉપયોગ તે એક 'સેફ હાઉસ' તરીકે કરતો હતો, જ્યાંથી છૂટક વેચાણ કરવામાં આવતું હતું.
