વડોદરા જિલ્લાના પાદરા પંથકમાં માર્ગ અકસ્માતોની વણઝાર યથાવત રહી છે. પાદરા-જંબુસર હાઈવે પર ડભાસા ગામ નજીક બે મોટરસાયકલ વચ્ચે સર્જાયેલા ભીષણ અકસ્માતમાં એક બાઈક ચાલકનું કમકમાટીભર્યું મોત નીપજ્યું છે. આ ઘટનાને પગલે હાઈવે પર ટ્રાફિક જામના દ્રશ્યો સર્જાયા હતા અને સ્થાનિકોના ટોળેટોળા ઉમટી પડ્યા હતા. ડભાસા ગામની સીમમાં પાદરા-જંબુસર રોડ પર બે બાઈક સામસામે અથડાઈ હતી.
પાદરા જંબુસર રોડ પર સર્જાયો હતો અકસ્માત
ટક્કર એટલી જોરદાર હતી કે બંને બાઈક સવારો રસ્તા પર પટકાયા હતા. આ અકસ્માતમાં એક બાઈક ચાલકને માથાના તેમજ શરીરના ભાગે ગંભીર ઈજાઓ પહોંચતા તેનું સ્થળ પર જ મોત નીપજ્યું હતું. જ્યારે અન્ય બાઈક સવારને પણ નાની-મોટી ઈજાઓ પહોંચી હોવાનું જાણવા મળ્યું છે. ઘટનાની જાણ થતા જ પાદરા પોલીસની ટીમ તાત્કાલિક ઘટનાસ્થળે દોડી ગઈ હતી. પોલીસે મૃતદેહને પોસ્ટમોર્ટમ અર્થે સરકારી હોસ્પિટલ ખાતે ખસેડવાની તજવીજ હાથ ધરી હતી.
