વલસાડ જિલ્લામાં વાપીની સ્પેશિયલ પોક્સો કોર્ટે શ્રમજીવી પરિવારની 6 વર્ષની બાળકીનું રેપ વિથ મર્ડર કરનાર આરોપી નરાધમ રઝાક સુભાનખાનને ફાંસીની સજા આપી સમાજમાં એક મજબૂત દાખલો બેસાડયો છે. કોર્ટના આ ચૂકાદા બાદ નાયબ મુખ્યમંત્રી હર્ષ સંઘવીએ સોશિયલ મીડિયા પર પોસ્ટ કરી હતી. તેમણે આ પોસ્ટમાં કહ્યું હતું કે, માત્ર ન્યાય નહીં ઝડપથી ન્યાય મળે છે.
નાયબ મુખ્યમંત્રી હર્ષ સંઘવીએ X પર કરી પોસ્ટ
નાયબ મુખ્યમંત્રી હર્ષ સંઘવીએ એકસ પર પોસ્ટ લખીને કહ્યું હતું કે, ગુજરાતમાં હવે માત્ર ન્યાય નહીં ઝડપથી ન્યાય મળે છે. દુષ્કર્મના કેસમાં આરોપીઓને ફાંસી અપાય છે. મહિલા સુરક્ષા માટે અમારી ઝીરો ટોલરન્સ નીતિ છે. વલસાડમાં દુષ્કર્મના આરોપીને ફાંસની સજા ફટકારવામાં આવી છે. વિપક્ષ દ્વારા મહિલાઓની સુરક્ષા મુદ્દે સરકારને ઘેરવા મુદ્દે વલસાડના કેસને ટાંકીને નાયબ મુખ્યમંત્રીએ સોશિયલ મીડિયા પર પોસ્ટ લખીને જવાબ આપ્યો હતો.
