વેરાવળ શહેરમાં હજુ ગઈકાલે જ નવીનીકરણ બાદ ખુલ્લા મુકાયેલા ડો. આંબેડકર પાર્કમાં ચોરીની ઘટના સામે આવતા ચકચાર મચી ગઈ છે. ગાર્ડન જનતા માટે ખુલ્લો મુકાયાના બીજા જ દિવસે એક વૃદ્ધના ખિસ્સામાંથી મોબાઈલની ઉઠાંતરી કરવામાં આવી હતી. જોકે, ગાર્ડનમાં સુરક્ષા માટે મુકવામાં આવેલી 'તીસરી આંખ' એટલે કે CCTV કેમેરા તંત્ર માટે આશીર્વાદરૂપ સાબિત થયા છે, જેમાં સમગ્ર ચોરીની ઘટના લાઈવ કેદ થઈ છે.
નવીકરણ બાદ ગાર્ડન ખુલ્લો મુકાયા બાદ ચોરી
એક વૃદ્ધ જ્યારે ગાર્ડનમાંથી બહાર નીકળી રહ્યા હતા, ત્યારે ભીડનો લાભ ઉઠાવીને ગઠિયા ગેંગના એક સાગરીતે અત્યંત ચપળતાથી વૃદ્ધના ખિસ્સામાંથી મોબાઈલ ફોન સેરવી લીધો હતો. વૃદ્ધને આ અંગેની જાણ થાય તે પહેલા જ ગઠિયો ફરાર થઈ ગયો હતો. ગાર્ડનના નવીનીકરણ બાદ લોકોના ભારે ઉત્સાહ અને ભીડ વચ્ચે તસ્કરોએ પોતાનો હાથ સાફ કરવાનું શરૂ કર્યું છે, જેનાથી સહેલાણીઓમાં ચિંતા ફેલાઈ છે.
