મહેસાણા શહેરના ઇતિહાસમાં પ્રથમવાર ભારતીય વાયુસેનાની ગૌરવશાળી 'સૂર્યકિરણ એરોબેટિક ટીમ' દ્વારા શાનદાર એર શોનું આયોજન કરવામાં આવ્યું હતું. આ ઇતિહાસિક પ્રસંગે 'સૂર્યકિરણ' ટીમના 9 હોક વિમાનના પાયલોટોએ આકાશમાં દિલધડક સ્ટંટ્સ અને એરોબેટિક કરતબોનું પ્રદર્શન કર્યું હતું. 900 થી 1000 કિલોમીટર પ્રતિ કલાકની ઝડપે ઉડાન ભરતા આ વિમાનોએ આકાશમાં અલગ-અલગ આકાર બનાવીને મહેસાણાના આકાશને શૌર્યના રંગોથી રંગી દીધું હતું. આ ભવ્ય અને રોમાંચક નજારો જોવા માટે મોટી સંખ્યામાં લોકો ઉમટી પડ્યા હતા.
એશિયાની ગૌરવશાળી ટીમનું પ્રદર્શન
સૂર્યકિરણ એરોબેટિક ટીમ એશિયાની એકમાત્ર એવી ટીમ છે જે એકસાથે 9 જેટ્સ સાથે એરોબેટિક પ્રદર્શન કરે છે, જે ભારત માટે ગૌરવની વાત છે. આ ટીમે તેમની અજોડ ચોકસાઈ અને શિસ્તનું પ્રદર્શન કર્યું હતું, જેમાં વિમાનો એકબીજાથી માત્ર થોડાક જ મીટરના અંતરે ઉડાન ભરીને જડબાતોડ ફોર્મેશન બનાવતા જોવા મળ્યા હતા. આ એર શોમાં લૂપ્સ, રોલ્સ, હેડ-ઓન ક્રોસ અને સિગ્નેચર 'ડીએનએ મનુવર' જેવા આકર્ષક દાવપેચ જોઈને દર્શકો મંત્રમુગ્ધ થઈ ગયા હતા.
