Ahmedabad : વરસાદમાં બોપલ સ્કાય સિટીના રોડ ધોવાતા સ્થાનિકોમાં રોષ, AMC કેવું કામ કરે છે તે જ ખબર નથી પડતી....!

અમદાવાદમાં ચોમાસાના સામાન્ય વરસાદે સ્માર્ટ સીટીને બિસ્માર સીટી બનાવી દીધું. આ સિઝનમાં શહેરમાં હળવાથી મધ્યમ વરસાદનું જોર જોવા મળ્યું હતું. આવા સામાન્ય વરસાદમાં શહેરના અનેક વિસ્તારમાં રોડનું ધોવાણ થયું. તો કયાંક પાણી ભરાવાના કારણે રોડ પર નદી વહેતી હોય તેવા દ્રશ્યો જોવા મળ્યા હતા. છેલ્લા બે દિવસથી શહેરમાં સતત વરસાદ વરસી રહ્યો છે. આવા વરસાદમાં બોપલમાં સ્કાય સિટીનો રોડ બિસ્માર હાલતમાં જોવા મળતા સ્થાનિકોમાં તંત્રની કામગીરીને લઈને નારાજગી જોવા મળી.

આખરે AMC કેવું કામ કરે છે

સ્થાનિકોએ આક્ષેપ કર્યો કે અમારા વિસ્તારમાં આ નવો જ રોડ બન્યો છે. છતાં આટલા વરસાદમાં જ રોડનું ધોવાણ થઈ ગયું. નવો બનેલો રોડ આખે આખો રોડ ધોવાઈ જઈ ઉબડખાબડ બની ગયો. આ રસ્તે નીકળતા પણ અમને અકસ્માતનો ડર લાગે છે. રસ્તામાં ગાબડા પડતા લોકો બાજુ પરથી પસાર થવા પ્રયાસ કરે છે. જેના કારણે વાહનોની ટક્કર થવાનું જોખમ રહે છે. આખરે AMC કેવું કામ કરે છે તે જ ખબર નથી પડતી. કારણ કે રોડ ઉપર માત્ર કપચી જ કપચી જોવા મળી.

નબળી કામગીરીથી રોડ બન્યા બિસ્માર

વધુમાં આક્ષેપ કરતાં કહ્યું કે અમારા વિસ્તારમાં જ્યારે રોડનું કામ ચાલતું હોય ત્યારે એ લોકોને કહીએ છીએ કે વધુ ડામર નાખો તો કહે 'ના અમને કહ્યું છે એટલે જ કરીશું'. એવું લાગે છે કે રસ્તો બનાવવાની કામગીરીમાં ભ્રષ્ટાચાર થતો હોવાનું લાગે છે. પહેલા રોડ બનાવો પછી તે તૂટે અને ફરી પાછો રોડ બનાવવામાં આવે. ભલે તૂટેલા રોડના કારણે લોકોને મુશ્કેલીઓ પડે. પરંતુ રોડ બાવવામાં તંત્ર અને કોન્ટ્રાક્ટર મિલીભગત કરી નાણાંની કમાણી કરતા રહે. છેલ્લા કેટલાક સમયથી શહેરમાં બોપલ વિસ્તાર ધીરે-ધીરે વધુ વિકસિત બન્યો છે. આ વિસ્તારમાં અનેક નવા બિલ્ડીંગ અને નવો મોલ ખુલી રહ્યા છે. પરંતુ વિકસતા આ વિસ્તારના રોડ વરસાદ અને તંત્રની નબળી કામગીરીના કારણે બિસ્માર બન્યા છે.