ગુજરાતમાં છેલ્લા બે દિવસથી મેઘરાજા મહેરબાન થયાં છે. ઉત્તર ગુજરાતમાં ધરોઈ અને સંત સરોવર ડેમમાંથી પાણી છોડવામાં આવતા સાબરમતી નદીમાં પાણીની આવક વધી છે. નદીમાં પાણીની આવક વધતાં સુભાષબ્રિજ પાસે રિવરફ્રન્ટ વોક વેમાં પાણી ઘૂસી ગયા હતાં. પાણીની સતત વધી રહેલી આવકને કારણે સાબરમતી નદીનું રૌદ્ર સ્વરૂપ જોવા મળ્યું છે. ઉપરવાસમાંથી પાણી છોડવામાં આવતા રિવરફ્રન્ટનો વોક વે તૂટ્યો છે.

અમદાવાદમાં સાબરમતી નદીમાં પાણીની ભરપૂર આવક

અમદાવાદમાં ચાલુ સિઝનમાં ચોમાસામાં પહેલીવાર સાબરમતી નદીનું રૌદ્ર સ્વરૂપ જોવા મળ્યું છે. આજે વહેલી સવારે નદી બે કાંઠે વહેતી થઈ હતી. નદીમાં પાણીની આવક વધતાં રિવરફ્રન્ટ પર લોકની અવરજવરને રોકવામાં આવી છે. નદીની સપાટીમાં વધારો થતાં પોલીસનો બંદોબસ્ત ગોઠવી દેવાયો છે. લોકોને રિવરફ્રન્ટના વોક વે પર નહીં જવા પોલીસ દ્વારા સૂચના આપવામાં આવી છે. સુભાષ બ્રિજ પાસે વોક વે પર પાણી ઘૂસી ગયાં છે. વોક વે પરથી મુલાકાતીઓને દૂર કરવામાં આવ્યાં છે.

પાણીની આવક વધતાં એક બિન વારસી બોટ તણાઈને આવી

સાબરમતી નદીમાં પાણીની આવક વધતાં એક બિન વારસી બોટ તણાઈને આવી છે. આ ઉપરાંત કેટલાક સાપ પણ પાણીના પ્રવાહમાં તણાઈને આવ્યાં છે. નદીમાં જળસ્તર સાચવી રાખવા માટે વાસણા બેરેજના 25 દરવાજા 6 ફૂટ સુધી ખોલવામાં આવ્યાં છે. અમદાવાદ શહેરમાં પણ વરસાદને કારણે અનેક વિસ્તારોમાં પાણી ઘૂસી ગયાં છે. શહેરમાં પૂર્વ અને પશ્ચિમ વિસ્તારમાં પાણી ભરાઈ જતાં લોકો અને વાહનચાલકોને હાલાકીનો સામનો કરવો પડ્યો છે.

Also Read