Ahmedabad News: મેઘરાજાની તોફાની બેટિંગથી એસજી હાઈવે પર પાણી ભરાયા, સાબરમતીના પ્રવાહમાં સાપ તણાઈ આવ્યા

અમદાવાદમાં છેલ્લા બે દિવસથી વરસી રહેલા વરસાદને કારણે ઠેર ઠેર પાણી ભરાઈ ગયાં છે. શહેરના અનેક વિસ્તારો પાણીમાં ગરકાવ થયા હોવાના દ્રશ્યો સામે આવ્યાં છે. ત્યારે સામાન્ય વરસાદમાં શહેરનો સૌથી પોશ ગણાતો એસજી હાઈવે પાણીમાં ગરકાવ થઈ ગયો છે. થલતેજ સર્વિસ રોડ પર નદી વહેતી હોય તેવા દ્રશ્યો જોવા મળ્યાં છે. રોડ પર ભરાઈ ગયેલા પાણીનો નિકાલ કરવા માટે નેશનલ હાઈવે ઓથોરિટી અને મહાનગર પાલિકા એક બીજાને ખો આપી રહ્યાં છે.

શહેરના અનેક વિસ્તારોમાં વરસાદને કારણે પાણી ભરાયા

અમદાવાદ શહેરમાં વરસાદમા જળબંબાકાર જેવી સ્થિતિ સર્જાઈ છે. શહેરના અનેક વિસ્તારોમાં વરસાદને કારણે પાણી ભરાઈ ગયાં છે. બીજી તરફ શહેરના એસજી હાઈવે પર સર્વિસ રોડ પાણીમાં ગરકાવ થઈ ગયો છે. પાણીના નિકાલ માટે નેશનલ હાઈવે ઓથોરિટી અને મહાનગર પાલિકા એક બીજાને ખો આપી રહ્યાં છે. સર્વિસ રોડની જવાબદારી AMCની હોવાથી પાણીનો નિકાલ થઈ રહ્યો નથી. જ્યારે હાઈવેની જવાબદારી નેશનલ હાઈવે ઓથોરિટીની હોવાથી પાણીના નિકાલ માટે કોઈ પગલા લેવામાં આવ્યા નથી. બંને એક બીજાને ખો આપતા હોવાથી બેદરકારી સામે આવી છે. જેનો ભોગ લોકો બની રહ્યાં છે.

એસજી હાઈવે પર ધમાકેદાર વરસાદ થવાથી પાણી ભરાઈ ગયા

અમદાવાદના એસજી હાઈવે પર ધમાકેદાર વરસાદ થવાથી પાણી ભરાઈ ગયા છે. ઓગણજ, વૈષ્ણોદેવી, ગોતા, સોલા અને એસજી હાઈવે પર પાણી ભરાઈ ગયાં છે. પાણી ભરાઈ જવાને કારણે વાહનચાલકોને ભારે હાલાકીનો સામનો કરવો પડ્યો છે. શહેરના પૂર્વ વિસ્તારમાં ધોધમાર વરસાદ ખાબકતાં નિકોલ, નરોડા, નારોલ, ઠક્કરનગર અને બાપુનગરમાં પણ પાણી ભરાયા હતાં. આ ઉપરાંત વસ્ત્રાપુર લેક પાસે પણ રહેણાંક વિસ્તારમાં ઘૂંટણસમા પાણી ભરાયા હતાં.