અમરેલી જિલ્લાના ખાંભા શહેર અને તેના આસપાસના ગ્રામ્ય વિસ્તારોમાં અચાનક વાતાવરણમાં પલટો આવતાં કમોસમી વરસાદ વરસ્યો હતો. ખાંભા શહેરમાં પવનના જોરદાર સુસવાટા સાથે વરસાદ પડ્યો હતો, જેના કારણે વાતાવરણમાં ઠંડક પ્રસરી ગઈ હતી પરંતુ ખેડૂતોમાં ચિંતાનો માહોલ છવાયો હતો. ખાંભા તાલુકાના દિવાના સરાકડિયા, નાનુડી ગામ અને દાઢીયાળી સહિતના અન્ય ગામોમાં પણ વરસાદ નોંધાયો છે. આ કમોસમી વરસાદે શિયાળુ પાકની તૈયારી કરી રહેલા ખેડૂતોને અનિશ્ચિતતામાં મૂકી દીધા છે.
મગફળી, કપાસ અને તુવેરના પાકને નુકસાન
આ કમોસમી વરસાદની સૌથી માઠી અસર ખેતરોમાં તૈયાર ઊભેલા પાક પર જોવા મળી છે. મુખ્યત્વે મગફળી, કપાસ અને તુવેર જેવા મહત્વના પાકોને આ માવઠાના કારણે મોટું નુકસાન થયું છે. લણણીના આખરી તબક્કામાં વરસાદ પડવાથી મગફળીના પાકમાં ગુણવત્તા બગડે છે અને કપાસમાં જીવાત પડવાની સંભાવના વધી જાય છે. તુવેરના પાકને પણ ભારે વરસાદથી નુકસાન થવાની ભીતિ છે. ખેડૂતોએ રાતોરાત પોતાનો તૈયાર પાક બચાવવા માટે દોડધામ કરી મૂકી હતી, પરંતુ ઘણા વિસ્તારોમાં નુકસાન થવાની ફરિયાદ મળી છે.
