ભાવનગર જિલ્લાના ખરેડ ગામમાં છેલ્લા બે દિવસમાં પડેલા 15 ઇંચ જેટલા અતિભારે વરસાદને કારણે ગામની હાલત અત્યંત કફોડી બની ગઈ છે. ભારે વરસાદના પરિણામે ગામમાંથી પસાર થતી માલણ નદીના ધસમસતા પાણીએ ગામમાં વિનાશ વેર્યો છે. નદીના પાણી ગામના નીચાણવાળા વિસ્તારોમાં ફરી વળતાં અનેક મકાનોમાં પાણી ઘૂસી ગયા હતા. આ ભયંકર પૂરના કારણે આશરે 100 થી 120 જેટલા ઘરોમાં રાખવામાં આવેલું અનાજ સંપૂર્ણપણે પલળી ગયું છે, જેનાથી ગ્રામજનોને મોટી આર્થિક નુકસાનીનો સામનો કરવો પડ્યો છે.
કોઝવે તૂટતા વાહન વ્યવહાર બંધ
ભારે વરસાદ અને પૂરના પાણીના પ્રવાહના કારણે ખરેડ ગામનો મુખ્ય કોઝવે તૂટી ગયો છે. આ કોઝવે ગામને બહારના વિસ્તારો સાથે જોડતો મુખ્ય માર્ગ હતો. કોઝવે તૂટી જવાના કારણે ગામનો વાહન વ્યવહાર સંપૂર્ણપણે બંધ થઈ ગયો છે. પરિણામે ખરેડ ગામ અન્ય વિસ્તારોથી સંપર્ક વિહોણું બની ગયું છે. કટોકટીની આ સ્થિતિમાં લોકો જીવનજરૂરી ચીજવસ્તુઓ મેળવવામાં પણ મુશ્કેલી અનુભવી રહ્યા છે. તૂટેલા કોઝવેનું સમારકામ તાત્કાલિક થાય તે ગ્રામજનો માટે અત્યંત જરૂરી છે.
