Dwarka news: વાડીનારમાં દિન દયાળ પોર્ટની જેટી પર ઊંટ તણાઈને આવ્યા, પોલીસે બહાર કાઢવા માલિકોને બોલાવ્યા

ગુજરાતમાં ચોમાસાની સિઝન ચાલી રહી છે. સૌરાષ્ટ્રમાં ભારે વરસાદની આગાહી કરવામાં આવી છે. દરિયા કિનારાના વિસ્તારોમાં વરસાદની આગાહી કરાઈ છે. દરિયામાં ભારે કરંટ હોવાથી માછીમારોને દરિયો નહીં ખેડવા માટે સૂચના આપવામાં આવી છે. ત્યારે દ્વારકામાં વાડીનાર જેટી ખાતે ઊંટનું ટોળુ દરિયામાં તણાઈને આવ્યું હતું. સમગ્ર બાબતે પોલીસને જાણ થતાં જ પોલીસ ઘટના સ્થળે પહોંચી ગઈ હતી.

સિંગચ ગામેથી ઉંટ તણાઇને આવ્યાની માહિતી

પ્રાપ્ત વિગતો પ્રમાણે દ્વારકાના વાડીનારમાં દિન દયાળ પોર્ટની જેટી પર ઊંટનું ટોળુ તણાઈને આવ્યું હતું. દ્વારકાના સિંગચ ગામેથી આ ઊંટનું ટોળુ દરિયામાં તણાઈને આવ્યું હોવાનું જાણવા મળ્યું છે. દરિયામાં ઊંટ તણાતા દેખાતા જ પોલીસને જાણ કરવામાં આવી હતી. પોલીસ તાત્કાલિક ઘટના સ્થળે પહોંચી હતી. આ ઊંટ કેવી રીતે દરિયામાં આવ્યા તેની તપાસ હાથ ધરી હતી.

ઊંટના ટોળાને બહાર કાઢવા તજવીજ હાથ ધરાઇ

પોલીસને આ ઊંટ દ્વારકાના સિંગચ ગામેથી દરિયામાં તણાઈને આવ્યા હોવાનું જાણવા મળ્યું હતું. ત્યાર બાદ ઊંટોના માલિકોને બોલાવીને દરિયામાંથી ઊંટોના ટોળાને બહાર કાઢવાની તજવીજ હાથ ધરાઈ હતી. મોટી સંખ્યામાં ઊંટ તણાઈને આવતા પોલીસ પણ ચોંકી ગઈ હતી. હાલમાં દરિયામાં ભારે કરંટ હોવાથી દરિયામાં માછીમારોને પણ નહીં જવા સૂચના અપાઈ છે. ત્યાં ઊંટોનું ટોળુ તણાઈને આવતાં સવાલો ઉભા થયાં છે.