Morbi: જિલ્લાના ચાર ડેમ ઓવરફ્લો થવાની તૈયારીમાં, લોકોને નદી કાંઠેથી દૂર રહેવા સૂચના

મોરબી જિલ્લામાં જળાશયોમાં પાણીની આવક જોવા મળી રહી છે. મોરબી જિલ્લાના 10 ડેમમાં પાણીની આવક થઈ રહી છે. મચ્છુ-1, મચ્છુ -3 ડેમ 100 ટકા ભરાયા છે. બ્રાહ્મણી 2 અને ઘોડાધ્રોઈ ડેમ 100 ટકા ભરાયા છે. મોરબીનો મચ્છુ 2 ડેમ 70 ટકા ભરાયો છે. જિલ્લામાં લોકોને નદી કાંઠેથી દૂર રહેવા સૂચના આપવામાં આવી છે. મોરબી જિલ્લાના દસ ડેમમાં કુલ 78.85 % જળસંગ્રહ થયો છે.

મોરબી જિલ્લામાં જળાશયોમાં પાણીની આવક

જિલ્લાની કુલ 10130 mcft ની ક્ષમતા સામે 8509 mcft પાણીનો સંગ્રહ થયો છે. મચ્છુ 1, મચ્છુ 3, બ્રાહ્મણી 2 અને ઘોડાધ્રોઈ ડેમ 100 % ભરાયા છે.મોરબી જિલ્લામાં સતત વરસી રહેલા વરસાદના પગલે ખેડૂતો ચિંતાતુર થયા છે. કપાસ, મગફળી તેમજ શેરડી સાથે બાગાયતી પાકોમાં દાડમ સહિતના પાકોમાં નુકસાન થવાની ભિતિ જોવા મળી રહી છે. મોરબીના વાંકાનેર ટંકારા માળીયા અને હળવદમાં સાર્વત્રિક વરસાદ નોંધાયો છે. વરસાદના પગલે ખેડૂતોના ઉભા પાકમાં પાણી ભરાયા છે.

જિલ્લાના 10 ડેમમાં પાણીની આવક 

જિલ્લામાં પડી રહેલા વરસાદના કારણે ખેડૂતોએ રાજ્ય સરકાર પાસે મદદની આસ લગાવી રહ્યા છે. ભારે વરસાદના પગલે ખેડૂતોને નુકસાની વેઠવાનો વારો આવ્યો છે. તો બીજી તરફ મોરબી જિલ્લાના દસ ડેમમાં કુલ 78.85 % જળસંગ્રહ થયો છે. પાણી સંગ્રહના લીધે ખેડૂતો શિયાળુ પાક લઈ શકે તે માટે પુરતા પ્રમાણમાં પાણી સંગ્રહ ડેમોમાં થઈ ગયો છે.