મોરબી જિલ્લાના જેતપર ગામેથી પસાર થઈ રહેલી હેવી વીજ લાઈનના વિરોધમાં ખેડૂતોએ હવે સરકાર સામે આરપારની લડાઈ લડવાનું રણશિંગું ફૂંક્યું છે.છેલ્લા ઘણા સમયથી ચાલી રહેલી આ લડત અને જમીન સંપાદન તેમજ વળતર જેવા વણઉકેલાયેલા પ્રશ્નોને લઈને ખેડૂતોમાં ભારે આક્રોશ જોવા મળી રહ્યો છે.જેતપર ગામે યોજાયેલી ખેડૂતોની એક મહત્વપૂર્ણ મીટિંગમાં નવી અને ઉગ્ર લડત લડવાનો મોટો નિર્ણય લેવામાં આવ્યો છે.જેના ભાગરૂપે ખેડૂતો હવે આમરણાંત ઉપવાસ પર ઉતરશે.
હાલ પ્રતિક ઉપવાસ ગુરૂવારે હજારો ખેડૂતો ઉમટશે
હાલના તબક્કે જેતપર ગામના અસરગ્રસ્ત ખેડૂતો પ્રતિક ઉપવાસ પર બેસીને પોતાનો વિરોધ નોંધાવી રહ્યા છે.પરંતુ આ આંદોલનને વધુ વ્યાપક બનાવવા માટે આગામી ગુરૂવારે જેતપર ગામે એક વિશાળ સભાનું આયોજન કરાયું છે.જેમાં મોરબી જિલ્લાના હજારોની સંખ્યામાં ખેડૂતો ઉપસ્થિત રહીને પોતાનું શક્તિપ્રદર્શન કરશે.ખેડૂતોએ સ્પષ્ટ ચિમકી ઉચ્ચારી છે કે જ્યાં સુધી તેમના પ્રશ્નોનું યોગ્ય અને સંતોષકારક નિરાકરણ નહીં આવે ત્યાં સુધી આ આમરણાંત ઉપવાસ ચાલુ રાખવામાં આવશે.
