મોરબીના જેતપર ગામમાં ખેડૂતોના હક્ક અને ન્યાય માટે શરૂ થયેલા આમરણાંત ઉપવાસ આંદોલનનો શનિવારે ત્રીજો દિવસ છે. પોતાના ખેતરોમાંથી પસાર થતા વીજપોલના યોગ્ય વળતરની માગ સાથે ખેડૂતો હવે આરપારની લડાઈ લડવાના મૂડમાં જોવા મળી રહ્યા છે. આ આંદોલન દિનપ્રતિદિન વધુ ઉગ્ર બની રહ્યું છે, જેમાં હવે પુરૂષોની સાથે મહિલાઓ પણ ખભેખભા મિલાવીને મેદાનમાં ઉતરી આવી છે.
6 પુરૂષો અને 3 મહિલાઓ સહિત 9 અન્નનો ત્યાગ કરીને બેઠા
જેતપરમાં ચાલી રહેલા આ આંદોલનમાં અત્યાર સુધીમાં 6 પુરૂષો અને 3 મહિલાઓ સહિત કુલ 9 ખેડૂતો આમરણાંત ઉપવાસ પર ઉતરી ગયા છે. આ ઉપરાંત, આસપાસના વિસ્તારોમાંથી પણ મોટી સંખ્યામાં ખેડૂતો પ્રતીક ઉપવાસમાં જોડાઈને આ લડતને સમર્થન આપી રહ્યા છે. ખેડૂતોની આ આક્રમકતા જોતા આગામી દિવસોમાં આ આંદોલન મોરબી પૂરતું સીમિત ન રહેતા સમગ્ર રાજ્યવ્યાપી બને તેવી પૂરેપૂરી શક્યતાઓ દેખાઈ રહી છે.
