Kachchh News: મુન્દ્રાના હટડી ગામે વિદ્યાર્થીઓ અને વાલીઓનો વિરોધ, શિક્ષકોની ભરતી કરવા માગ

શિક્ષકની ઘટ લઈને ઠેર-ઠેર વિરોધનો વંટોળ, રાજ્યમાં શિક્ષકોની ઘટને લઈને વારંવાર લોકો દ્વારા વિરોધની સાથે સાથે શિક્ષકોની ભરતી કરવા બાબતે માંગણીઓ કરવામાં આવી છે પરંતુ સરકારનાં પેટનું પાણી પણ હલતું નથી ત્યારે કચ્છ જિલ્લામાં મુન્દ્રાના હટડી ગામે પ્રાથમિક શાળાના વિદ્યાર્થીઓએ તેમજ વાલીઓએ સાથે મળીને બેનર અને સુત્રોચ્ચાર સાથે વિરોધ કરી રહ્યા છે.

પ્રા.શાળામાં શિક્ષકોની ભરતી ન કરતાં વિદ્યાર્થીઓનું બગડી રહ્યું છે ભવિષ્ય

સરકાર દ્વારા વહેલામાં વહેલી તકે જો ભરતી કરવામાં આવે તો બાળકોનું ભવિષ્ય બગડે નહી. હટડી ગામના વિદ્યાર્થીઓ અને વાલીઓએ સૂત્રોચાર કરી વિરોધ દર્શાવ્યો હતો. હટડી પ્રાથમિક શાળાના વિદ્યાર્થીઓએ હાથમાં બેનર અને સુત્રોચાર સાથે વિરોધ નોંધાવી કચ્છ જિલ્લામાં શિક્ષકોની ભરતી ઝડપથી કરવામાં આવે તેવી માંગ કરી હતી.

કચ્છ જિલ્લામાં 1,645 જેટલી પ્રાથમિક શાળા

રાજ્યમાં સૌથી વધારે શિક્ષકોની ઘટ કચ્છ જિલ્લામાં જોવા મળી રહી છે. જિલ્લાની પ્રાથમિક શાળામાં 50 ટકા મહેકમની ઘટ જોવા મળી રહી છે. જિલ્લામાં શિક્ષકોની ઘટના કારણે શિક્ષણની હાલત કથળી છે. 100 જેટલી શાળામાં એકપણ શિક્ષક નથી, જ્યારે 150 જેટલી શાળામાં માત્ર એક શિક્ષક કાર્યરત છે. જિલ્લામાં 4,700 જેટલા શિક્ષકોની ઘટ જોવા મળી રહી છે. આ પહેલા પણ કચ્છ જિલ્લામાં શિક્ષકોની ઘટ મામલે આશાપુરા ચેરીટેબલ ટ્રસ્ટ દ્વારા શિક્ષણ અધિકારીને આવેદનપત્ર પાઠવી જિલ્લામાં તાત્કાલિક શિક્ષકોની ભરતી કરવામાં આવે તેવી માગં કરી હતી. જો તાત્કાલિક ભરતી કરવામાં નહી આવે તો સરકાર સામે ઉગ્ર આંદોલનની ચીમકી ઉચ્ચારી હતી. હવે કચ્છ જિલ્લામાં શિક્ષકોની અછત ક્યારે દૂર થશેએ જોવું રહ્યું?