Panchmahalના શહેરામાં નકલી ડૉક્ટર પર SOGનો સપાટો, એલોપેથિક દવાઓનો જથ્થો મળ્યો

પંચમહાલ જિલ્લાના શહેરા તાલુકાના વાઘજીપુર ગામની ચોકડી પર આવેલા રાજ નામના દવાખાનામાં સ્પેશિયલ ઓપરેશન ગ્રૂપ પોલીસે મોડી સાંજે દરોડા પાડીને તપાસ હાથ ધરી હતી. આ કાર્યવાહી દરમિયાન દવાખાનામાંથી મોટા પ્રમાણમાં એલોપેથિક દવાઓનો જથ્થો મળી આવ્યો હતો. SOG પોલીસને એવી માહિતી મળી હતી કે આ દવાખાનાના તબીબ પાસે DHMSની ડિગ્રી હોવા છતાં તે MBBS તબીબની જેમ એલોપેથિક દવાઓ અને સારવાર આપી રહ્યો હતો.

SOG પોલીસે દવાખાનામાં ઝીણવટભરી તપાસ કરી હતી

એક મેડિકલ ઓફિસર અને DHMSની ડિગ્રી ધરાવતા તબીબને સાથે રાખીને SOG પોલીસે તપાસ શરૂ કરી હતી. પોલીસ દ્વારા બે કલાકથી વધુ સમય આ દવાખાનામાં ઝીણવટભરી તપાસ ચાલી હતી. દરોડા દરમિયાન મળી આવેલી એલોપેથિક દવાઓના જથ્થા અંગે પોલીસ તબીબની પૂછપરછ કરી હતી. આ કાર્યવાહી આગામી કેટલાક કલાકો સુધી ચાલુ રહેશે તેવી શક્યતા છે. આ દરોડાથી શહેરા પંથકમાં ચાલતા આવા નકલી દવાખાનાઓ પર પણ સવાલ ઉભા થયા હતા.

દરોડાથી બોગસ ડોક્ટરોમાં ફેલાયો ફફડાટ

SOG પોલીસની આ કાર્યવાહીનો મુખ્ય હેતુ લોકોના સ્વાસ્થ્ય સાથે ચેડા કરતા નકલી તબીબોને પકડવાનો અને ગેરકાયદેસર મેડિકલ પ્રેક્ટિસને અટકાવવાનો હતો. આ પ્રકારના દરોડાથી બોગસ ડોક્ટરોમાં ફફડાટ ફેલાયો હતો. તપાસ પૂર્ણ થયા બાદ જ આ મામલે વધુ વિગતો બહાર આવશે અને પોલીસ દ્વારા કાયદેસરની કાર્યવાહી કરવામાં આવશે.