વડોદરામાં ભાજપના પાંચ ધારાસભ્યોએ મુખ્યમંત્રીને પત્ર લખીને અધિકારીઓ કોઈનું સાંભળતા નથી. લોકોની રજૂઆતો સાંભળવામાં આવતી નથી તેવી રજૂઆત કરી હતી. આ ઉપરાંત જિલ્લા વહીવટીતંત્રની કામગીરી સામે ગંભીર સવાલો ઉઠાવ્યા હતાં. ધારાસભ્યોએ આરોપ લગાવ્યો હતો કે અધિકારીઓ જમીન પરની હકીકતથી વિપરીત પરિસ્થિતિનું ગુલાબી ચિત્ર સરકાર સમક્ષ રજૂ કરે છે. ભાજપના આ ધારાસભ્યો કરતાં સાંસદ હેમાંગ જોશીનો મત કંઈક જુદો જ છે.
અમારે ત્યાં બધી જ યોજનાઓના કેમ્પ ચાલે છે
વડોદરાના ભાજપના જ સાંસદ હેમાંગ જોશીએ કહ્યું હતું કે, જનતાના કામ થાય જ છે. ધારાસભ્યોએ શું રજૂઆત કરી છે તે મને ખ્યાલ નથી. તમામ લોકો એકબીજાને સહયોગ કરે છે. મારી ઓફિસ જ કલેક્ટર કચેરીના સંકુલમાં છે.અમારે ત્યાં બધી જ યોજનાઓના કેમ્પ ચાલે છે. કલેક્ટર સહિત તમામ અધિકારીઓ અમારા સંકલનમાં રહે છે. અમને હજુ કોઈ કડવો અનુભવ થયો નથી. ધારાસભ્યોએ મુખ્યમંત્રીને જે પત્ર લખ્યો છે આ પત્ર મને મળશે તો તેની તપાસ કરીશ.
