રાજકોટ શહેરમાં અસામાજિક તત્વોનો આતંક યથાવત જોવા મળી રહ્યો છે. શહેરના ભરચક વિસ્તારમાં અને બજરંગ પોલીસ ચોકીની બિલકુલ સામે જ હવા ભરવાના રૂપિયા બાબતે મારામારીની ઘટના સામે આવી છે. આ સમગ્ર ઘટનાના CCTV ફૂટેજ પણ સામે આવ્યા છે. જેમાં ત્રણ લોકો જાહેરમાં મારામારી કરતા સ્પષ્ટપણે દેખાઈ રહ્યા છે.


3 લોકોએ જાહેરમાં કરી મારામારી

મળતી માહિતી અનુસાર, આ ઘટના રાજકોટના એક પેટ્રોલપંપ નજીક બની હતી. વાહનચાલકે ટાયરમાં હવા ભરાવ્યા બાદ તેના રૂપિયા આપવાનો ઇનકાર કરતા આ વિવાદ વકર્યો હતો. જોતજોતામાં ઉગ્ર બોલાચાલી મારામારીમાં પરિણમી હતી. CCTV ફૂટેજમાં જોઈ શકાય છે કે ત્રણ જેટલા શખ્સો જાહેરમાં એકબીજાને માર મારી રહ્યા છે. આશ્ચર્યજનક બાબર એ છે કે, આ મારામારી બજરંગ પોલીસ ચોકીથી ગણતરીના મીટરો દૂર જ થઇ હતી. આ ઘટનાના CCTV ફૂટેજ વાયરલ થતાં શહેરભરમાં ખળભળાટ મચી ગયો છે.

Also Read

સમગ્ર ઘટનાના CCTV આવ્યા સામે

મહત્વનું છે કે, જાહેરમાં અને પોલીસ ચોકીની નજીક જ આવા પ્રકારની ઘટના બનતા કાયદો અને વ્યવસ્થાની સ્થિતિ પર સવાલો ઉભા થયા છે. પોલીસે તાત્કાલિક આ ફૂટેજના આધારે તપાસ હાથ ધરીને મારામારી કરનાર શખ્સોને ઝડપી પાડી કાયદેસરની કાર્યવાહી કરવી જોઈએ તેવી લોક માંગ ઉઠી છે.



  • Follow us on: