Rajkotમાં 26 સપ્ટેમ્બરે 'બાયોટેક કોન્કલેવ' યોજાશે, બાયોટેક ફિલ્ડના વ્યાપ અંગે મંથન કરાશે

ગુજરાત સ્ટેટ બાયોટેકનોલોજી મિશન દ્વારા બાયોટેકનોલોજી ક્ષેત્રે ઊભરતી તકો અને ભવિષ્યની સંભાવનાઓ અંગે રાજકોટમાં 26મી સપ્ટેમ્બરે બાયોટેક કોન્કલેવનું આયોજન કરવામાં આવ્યું છે. જેમાં વિવિધ ઉદ્યોગકારો, શિક્ષણવિદો સહિતના લોકો સાથે મળીને બાયોટેક ફીલ્ડના વ્યાપ અંગે મંથન કરશે.

10થી 2 વાગ્યા દરમિયાન રીજીયોનલ બાયોટેકનોલોજી કોન્કલેવ યોજાશે

વિજ્ઞાન અને ટેકનોલોજી વિભાગ હેઠળ કાર્યરત ગુજરાત સ્ટેટ બાયોટેકનોલોજી મિશનના ડાયરેક્ટર દિગ્વિજયસિંહ જાડેજા દ્વારા આજે રાજકોટમાં પત્રકાર પરિષદમાં આ માહિતી આપવામાં આવી હતી. તેમણે જણાવ્યું હતું કે, આઈ.ટી. ફિલ્ડની જેમ બાયો ટેક્નોલોજી ફિલ્ડમાં ખૂબ સારી તકો છે અને ભવિષ્ય ઉજ્જ્વળ છે. વર્તમાન સમયમાં જોવા મળતા પ્રદૂષણ, બીમારીઓ સહિતના અનેક પ્રશ્નોના ઉકેલ બાયો ટેક્નોલોજીમાં જોવામાં આવે છે. તેમણે કહ્યું હતું કે, આગામી 26 સપ્ટેમ્બરના રોજ રાજકોટમાં સવારે 10થી 2 વાગ્યા દરમિયાન રીજીયોનલ બાયોટેકનોલોજી કોન્કલેવ યોજાશે. જેમાં ગુજરાત બાયોટેકનોલોજી પોલિસી 2022-27, સંશોધન સહાય યોજના તેમજ તાલીમ કાર્યક્રમો સહિત બાયોટેકનોલોજી ક્ષેત્રમાં રાજ્ય સરકાર દ્વારા શરૂ કરાયેલી વિવિધ યોજનાઓ અંગે વિદ્યાર્થીઓ, સંશોધકો તેમજ ઉદ્યોગ સાહસિકો સાથે ચર્ચા કરી માર્ગદર્શન આપવામાં આવશે.

ઈનોવેશનથી મહત્વપૂર્ણ પડકારો અને સમસ્યાઓનું સમાધાન

તેમણે વિશેષમાં જણાવ્યું હતું કે કોન્ફ્લેવમાં વિવિધ ક્ષેત્રના અગ્રણીઓ, ઉદ્યોગપતિઓ, ઈન્ડસ્ટ્રી એસોસિએશન્સ, સંશોધકો અને ઈનોવેટર્સ બાયોટેકનોલોજી ક્ષેત્રમાં રહેલી સંભાવનાઓ વિશે ચર્ચા કરશે. રાજકોટ તેમજ સમગ્ર સૌરાષ્ટ્રમાં બાયોટેકનોલોજી ક્ષેત્રે નવા ઉદ્યોગો, સંશોધન સંસ્થાઓ અને શૈક્ષણિક સંસ્થાઓ દ્વારા રાજ્ય તેમજ દેશના વિકાસમાં પોતાની ભૂમિકા ભજવી શકે તે માટે આ કોન્કલેવ યોજાશે. આ ઉપરાંત તેમણે બાયોટેકનોલોજી અંતર્ગત સરકારની વિવિધ સહાયલક્ષી યોજનાઓ, ઔદ્યોગિક અને શૈક્ષણિક તકો વિશે વિસ્તૃત જાણકારી આપતાં કહ્યું હતું કે, બાયોટેકનોલોજી થકી હેલ્થકેર, કૃષિ, બાયો-એનર્જી અને ઇન્ડસ્ટ્રીયલ બાયોટેક જેવા ક્ષેત્રે ઈનોવેશનથી મહત્વપૂર્ણ પડકારો અને સમસ્યાઓનું સમાધાન થઇ રહ્યું છે.

તેમણે આ સાથે રાજ્ય સરકારની ગુજરાત બાયોટેકનોલોજી પોલિસી 2022-27 અંતર્ગત ઉદ્યોગોને નાણાકીય સહાય અંગેની જાણકારી આપતા કહ્યું હતું કે, રૂ.200 કરોડથી ઓછા મૂડી રોકાણમાં ૨૫%ના દરે રૂ.40 કરોડ સુધી અને રૂ.200 કરોડથી વધુ મૂડી રોકાણ/ મેગા/ ખાસ પ્રોજેક્ટ્સ ૨૫%ના દરે રૂ. 200 કરોડ સુધી કેપિટલ સબસીડી સરકાર દ્વારા આપવામાં આવે છે.