ગુજરાત માટે એક અત્યંત મહત્ત્વપૂર્ણ ચુકાદામાં, રાજકોટ સેશન્સ કોર્ટે આતંકવાદી પ્રવૃત્તિઓમાં સામેલ ત્રણ આરોપીઓને જન્મટીપની સજા ફટકારી છે. આ ત્રણેય આતંકીઓને જુલાઈ 2023માં ગુજરાત ATS દ્વારા રાજકોટના સોની બજાર વિસ્તારમાંથી ઝડપી પાડવામાં આવ્યા હતા. આતંકવાદ વિરોધી આ કડક ચુકાદાથી સુરક્ષા એજન્સીઓના પ્રયાસોને સમર્થન મળ્યું છે. કોર્ટે ત્રણેય આરોપીઓ—અબ્દુલ અલી, અમન મલિક અને સાફન શાહીદ—ને દોષિત ઠેરવીને આ સજા સંભળાવી છે.
રાહ-એ-હિદાયત ગ્રુપ સાથે જોડાણ
કોર્ટમાં રજૂ કરાયેલા પુરાવા મુજબ, આ ત્રણેય આરોપીઓ 'રાહ-એ-હિદાયત' નામના આતંકી ગ્રુપમાં જોડાયા હતા. તેઓનું મુખ્ય કાર્ય સરકાર અને કાશ્મીરીઓ વિરુદ્ધ ઝેર ઓકવું અને યુવાનોને ભડકાવીને આતંકવાદ તરફ આકર્ષિત કરવાનું હતું. આતંકીઓ સોશિયલ મીડિયા અને અન્ય માધ્યમોનો ઉપયોગ કરીને યુવાનોમાં કટ્ટરતા ફેલાવવાનું અને આતંકી ગતિવિધિઓ માટે ફંડ એકઠું કરવાનું નેટવર્ક ચલાવતા હતા. આ પ્રકારના કૃત્યો રાષ્ટ્રીય સુરક્ષા માટે ગંભીર ખતરો ઊભો કરતા હોવાથી કોર્ટે તેમને સખતમાં સખત સજા ફટકારી છે.
