Suratમાં ઓલપાડ-સાયણ રોડ પર બેફામ કારચાલકે નશાની હાલતમાં 2 સાયકલ ચાલકોને મારી ટક્કર, બંનેના કરુણ મોત

સુરત જિલ્લાના ઓલપાડ-સાયણ રોડ પર એક ગમખ્વાર માર્ગ અકસ્માત સર્જાયો હતો. નશાની હાલતમાં બેફામ કાર ચલાવી રહેલા એક ચાલકે બે સાયકલ સવારને અડફેટે લીધા હતા. જેના કારણે બંનેના કરુણ મોત નીપજ્યા હતા. જ્યારે એક વ્યક્તિ ગંભીર રીતે ઇજાગ્રસ્ત થયો હતો. આ દુર્ઘટના ઓલપાડ-સાયણ રોડ પર બની હતી. જ્યાં કારચાલકે તેની કાર બેફામ ગતિએ હંકારીને સાયકલ સવારોને પાછળથી ટક્કર મારી હતી.

બે સાયકલ ચાલકોના ઘટનાસ્થળે મોત 

આ અકસ્માતમાં બે સાયકલ ચાલકોના ઘટનાસ્થળે જ મોત નીપજ્યા હતા. જ્યારે એક વ્યક્તિને ગંભીર ઈજાઓ પહોંચી હતી. અકસ્માતની જાણ કરાતા જ પોલીસ તાત્કાલિક ઘટનાસ્થળે પહોંચી હતી. પોલીસે તાત્કાલિક કાર્યવાહી કરીને કારચાલકને પકડી પાડ્યો હતો. પ્રાથમિક તપાસમાં કારચાલક નશાની હાલતમાં હોવાનું માલુમ પડ્યું હતું. પોલીસે આરોપી વિરુદ્ધ ગુનો નોંધીને વધુ તપાસ હાથ ધરી હતી.

બેફામ ડ્રાઇવિંગ અને ડ્રિંક એન્ડ ડ્રાઇવના કેસોમાં વધારો 

આ ઘટનાએ ફરી એકવાર શહેરમાં બેફામ ડ્રાઇવિંગ અને ડ્રિંક એન્ડ ડ્રાઇવના વધતા કેસો પર ગંભીર ચિંતા ઉભી કરી હતી. નશાની હાલતમાં વાહન ચલાવવું એ માત્ર પોતાના માટે જ નહીં પરંતુ અન્ય લોકો માટે પણ જોખમી સાબિત થાય છે. પોલીસે આવા બેફામ ચાલકો સામે કડક કાર્યવાહી કરવાની માંગ લોકો દ્વારા કરવામાં આવી હતી.