Suratના રઘુકુળ માર્કેટની એક દુકાનમાં લાગી આગ, વેપારીઓમાં અફરાતફરી

સુરતના વેપારી કેન્દ્ર સમા રિંગ રોડ પર આવેલા રઘુકુળ માર્કેટમાં એક દુકાનમાં આગ લાગતા ભારે દોડધામ અને અફરાતફરીનો માહોલ સર્જાયો હતો. આ ઘટનાની જાણ થતા જ ફાયર બ્રિગેડની ટીમ તાત્કાલિક ઘટનાસ્થળે પહોંચી હતી અને ભારે જહેમત બાદ આગ પર કાબૂ મેળવ્યો હતો. રઘુકુળ માર્કેટના નીચેના માળે આવેલી એક દુકાનમાં અચાનક આગ ભભૂકી ઉઠી હતી. આગ લાગવાના કારણે ધુમાડાના ગોટેગોટા નીકળતા વેપારીઓ અને ત્યાં હાજર લોકોમાં ગભરાટ ફેલાયો હતો.

ફાયર ટીમે તાત્કાલિક સ્થળ પર પહોંચી આગ અટકાવી 

વેપારીઓએ તાત્કાલિક પોતાનો માલ-સામાન બચાવવાનો પ્રયાસ કર્યો હતો અને ફાયર બ્રિગેડને જાણ કરી હતી. આગની જાણ થતા જ ફાયર વિભાગની ગાડીઓ તાત્કાલિક સ્થળ પર પહોંચી ગઈ હતી. ફાયર ટીમે આગ પર પાણીનો મારો ચલાવીને તેને વધુ ફેલાતી અટકાવી હતી. ફાયરકર્મીઓએ ભારે જહેમત બાદ આગને કાબૂમાં લીધી હતી. જેના કારણે માર્કેટમાં અન્ય દુકાનોને વધુ નુકસાન થતું અટકાવવામાં આવ્યું હતું. આગ કાબૂમાં આવતા જ વેપારીઓએ રાહતનો શ્વાસ લીધો હતો. 

શોર્ટ સર્કિટને કારણે આગ લાગી હોવાની શક્યતા

લોકોના જણાવ્યા અનુસાર શોર્ટ સર્કિટથી આગ લાગી હોવાની શક્યતા છે. પરંતુ ચોક્કસ કારણ જાણવા માટે ફાયર વિભાગ અને પોલીસ દ્વારા વધુ તપાસ હાથ ધરવામાં આવી હતી. આ દુર્ઘટનાને કારણે દુકાનમાં મોટા પ્રમાણમાં નુકસાન થયું હોવાનો અંદાજ છે. આ ઘટનાએ માર્કેટ જેવા વ્યસ્ત વિસ્તારોમાં ફાયર સેફ્ટીની વ્યવસ્થા પર ગંભીર સવાલો ઉભા કર્યા હતા. વેપારીઓ અને ગ્રાહકોની સુરક્ષા માટે આવા વિસ્તારોમાં ફાયર સેફ્ટીના સાધનો અને નિયમોનું કડક પાલન થવું અત્યંત જરૂરી બન્યું છે.