Surat : શિક્ષિકાના આપઘાત બાદ તંત્ર જાગ્યું, વિવિધ વિસ્તારોમાં વાહન ચેકિંગ ડ્રાઈવ શરૂ કરી

સુરતના કતારગામ વિસ્તારમાં 19 વર્ષીય શિક્ષિકાએ આપઘાત કરવાની ઘટના બાદ ચારે બાજુ ભારે ચકચાર મચી ગઈ છે. જો કે શહેરમાં શિક્ષિકાના આપઘાત બાદ તંત્ર જાગ્યું છે અને સુરત પોલીસ દ્વારા અલગ અલગ વિસ્તારમા ડ્રાઈવ શરૂ કરવામાં આવી છે. કતારગામ વિસ્તાર અસામાજિક તત્વોનો અડ્ડો બન્યો હોવાની સામાજિક અગ્રણીઓએ અગાઉ રજૂઆત કરી હતી. ત્યારે હાલમાં કતારગામ વિસ્તારમાં સ્થાનિક પોલીસ દ્વારા વાહન ચેકિંગની ડ્રાઈવ શરૂ કરવામાં આવી છે.

પોલીસે બ્લેક કાચવાળી ગાડીઓને ફટકાર્યો દંડ

આ સાથે જ પોલીસે વિદ્યાર્થીનીઓને જાગૃત કરવાની ડ્રાઈવ પણ શરૂ કરી દીધી છે. કાળા કાચ વાળી ગાડીઓને દંડ કરવાની કામગીરી પોલીસ દ્વારા હાથ ધરવામાં આવી છે. વિદ્યાર્થીઓને સમજ આપવામાં આવી કે કોઈપણ ઈસમ હેરાન કરે તો પોલીસને મદદ માટે તાત્કાલિક જાણ કરવી. આગામી દિવસોમાં ડ્રાઈવ વધુ મજબૂતીથી આગળ વધારવામાં આવશે. પોલીસે મહિલા સેલને સાથે રાખીને આ કામગીરી હાથ ધરવામાં આવી.

સુરતમાં 19 વર્ષીય યુવતીના આપઘાત મુદ્દે ફરિયાદ

તમને જણાવી દઈએ કે સુરતમાં 19 વર્ષીય યુવતીના આપઘાત મુદ્દે ફરિયાદ નોંધાઈ છે. નીલ દેસાઈ અને તેના પિતા સામે ફરિયાદ નોંધાઈ છે. યુવતીના પિતાએ દુષ્પ્રેરણાનો ગુનો નોંધાવ્યો છે. નીલ સંબંધ રાખવા માટે દબાણ કરતો હોવાનો આક્ષેપ કરવામાં આવ્યો છે. ફોન પર અભદ્ર ભાષામાં વાત કરતો હોવાનો પણ આક્ષેપ કરાયો છે. નીલ રૂપિયા 30 હજારની માંગણી કરતો હોવાનો આક્ષેપ છે. નીલના પિતાને આ સમગ્ર વાતની જાણ હોવાનો પણ ઉલ્લેખ કરવામાં આવ્યો છે. આ સિવાય નીલના પિતાએ ધમકી આપ્યાનો ફરિયાદમાં ઉલ્લેખ કરાયો છે.