સુરતના વેડરોડ વિસ્તારમાં આવેલા પંડોળ ગામમાં એક ઓનલાઇન પ્રોડક્ટના ગોડાઉનમાં શોર્ટ-સર્કિટના કારણે ભીષણ આગ લાગી હતી. આ ઘટનામાં કોઈ જાનહાનિ થઈ નથી, પરંતુ ગોડાઉનમાં રહેલો સામાન બળીને ખાખ થઈ ગયો હતો.


ગોડાઉનમાં શોર્ટ-સર્કિટના કારણે ભીષણ આગ લાગી

ઘટના સમયે ગોડાઉનમાં બે કર્મચારીઓ હાજર હતા. આગની જાણ થતાં જ બંને કર્મચારીઓ સમયસર ગોડાઉનની બહાર દોડી ગયા હતા અને તાત્કાલિક ફાયરબ્રિગેડને જાણ કરી હતી. ફાયરબ્રિગેડને જાણ થતા જ ફાયરબ્રિગેડની 6 ગાડીઓ ઘટના સ્થળે પહોંચી હતી.

આગ પર કાબૂ મેળવવામાં મુશ્કેલી પડી

ગોડાઉનમાં મોટા પ્રમાણમાં પ્લાસ્ટિકનું પેકિંગ મટિરિયલ અને પૂંઠાનો સામાન હોવાથી આગ વધુ પ્રસરી હતી અને ચારે બાજુ ધુમાડાના ગોટેગોટા છવાઈ ગયા હતા. ધુમાડો વધુ હોવાથી ફાયરની ટીમને આગ પર કાબૂ મેળવવામાં મુશ્કેલી પડી હતી. જોકે, સતત એક કલાકની જહેમત બાદ ફાયરના જવાનોએ આગ પર સંપૂર્ણ કાબૂ મેળવી લીધો હતો. આ ઘટનામાં આગ લાગવાનું પ્રાથમિક કારણ શોર્ટ-સર્કિટ હોવાનું જાણવા મળ્યું છે. સદનસીબે, આ આગમાં કોઈ જાનહાનિ થઈ નથી. જોકે, ગોડાઉનમાં રહેલો કરોડોનો સામાન બળીને રાખ થઈ ગયો હતો. 

  • Follow us on: