Suratમાં બેફામ મોટા વાહનો સામે પોલીસની કડક કાર્યવાહી, 24 કલાકમાં 102 વાહનો કરાયા ડિટેઇન

સુરત શહેરમાં માર્ગ અકસ્માતોની વધતી ઘટનાઓને પગલે સુરત પોલીસે હવે મોટા વાહનો સામે કડક કાર્યવાહી શરૂ કરી છે. જેમાં છેલ્લા 24 કલાકમાં પોલીસે નિયમભંગ કરતા 102 જેટલા મોટા વાહનોને ડિટેઇન કર્યા હતા. આ કાર્યવાહીનો મુખ્ય હેતુ શહેરમાં માર્ગ સલામતી સુનિશ્ચિત કરવાનો હતો. પોલીસ દ્વારા ડિટેઇન કરાયેલા તમામ વાહનચાલકોને RTOનો મેમો પણ આપવામાં આવ્યો હતો. આ કાર્યવાહી માત્ર વાહનચાલકો પૂરતી સીમિત નથી.

વાહનોના માલિકો સામે પણ થશે કાયદેસરની કાર્યવાહી

પોલીસે સ્પષ્ટ કર્યું હતું કે આવા વાહનોના માલિકો સામે પણ કાયદેસરની કાર્યવાહી કરવામાં આવશે. આનાથી વાહનના માલિકો પણ તેમના ડ્રાઇવરોને નિયમોનું પાલન કરાવવા માટે જવાબદાર બનશે. પોલીસે આ કાર્યવાહી ત્યારે શરૂ કરી હતી જ્યારે તાજેતરમાં શહેરમાં મોટા વાહનોને કારણે અનેક ગંભીર અકસ્માતો થયા છે. આ ઘટનાઓને કારણે લોકોમાં પોલીસની કામગીરી સામે રોષ જોવા મળ્યો હતો. જ્યારે તેને લઈ હવે પોલીસ જાગૃત થઈ હતી અને કડક પગલાં ભરી રહી છે.

કાયદાનું ઉલ્લંઘન કરનારને છોડવામાં નહીં આવે

આ કાર્યવાહીનો મુખ્ય ઉદ્દેશ્ય શહેરમાં વાહનવ્યવહારને વધુ સુરક્ષિત બનાવવાનો હતો. મોટા વાહનો અને તેમાં પણ ખાસ કરીને ભારે ટ્રકો અને ડમ્પરો ઘણીવાર નિયમોનું ઉલ્લંઘન કરીને બેફામ ગતિએ ચાલતા હોય છે. જેના કારણે નિર્દોષ લોકોનો ભોગ લેવાય છે. પોલીસે આ કડક કાર્યવાહી દ્વારા આવા વાહનચાલકો અને માલિકોને એક સ્પષ્ટ સંદેશ આપ્યો હતો કે કાયદાનું ઉલ્લંઘન કરનારને છોડવામાં આવશે નહીં.