Surat News : શિક્ષકની બદલી થતા વિદ્યાર્થીઓ રોષે ભરાયા, રસ્તા પર સૂઈને કર્યો વિરોધ

સુરતના કઠોદરા વિસ્તારમાં આવેલી સરકારી શાળાના એક શિક્ષકની બદલી થતાં વિદ્યાર્થીઓ અને વાલીઓમાં ઉગ્ર રોષ જોવા મળ્યો છે. આ બદલીના વિરોધમાં વિદ્યાર્થીઓએ રસ્તા પર ઉતારીને ચક્કાજામ કર્યો હતો.

વિદ્યાર્થીઓ રસ્તા પર ઉતરી ચક્કાજામ કર્યો

તમને જણાવી દઈએ કે, કઠોદરા સરકારી સ્કૂલના લોકપ્રિય શિક્ષકની અચાનક બદલી કરી દેવામાં આવતા વિદ્યાર્થીઓમાં આઘાત અને ગુસ્સો જોવા મળ્યો હતો. અગાઉ સિકયુરિટી ગાર્ડ કૌભાંડને લઈને થયેલી ચર્ચાઓ બાદ આ શિક્ષકની બદલીથી વિદ્યાર્થીઓનો રોષ વધુ ભડક્યો હતો. આ વિરોધ પ્રદર્શન દરમિયાન વિદ્યાર્થીઓ વાહનો સામે રસ્તા પર સૂઈ ગયા હતા અને ટ્રાફિક જામ કરી દીધી હતો.

વિદ્યાર્થીઓ અને વાલીઓ પણ વિરોધમાં જોડાયા

મહત્વનું છે કે, વિદ્યાર્થીઓ સાથે વાલીઓ પણ આ વિરોધમાં જોડાયા હતા અને શિક્ષકની બદલી રદ કરવાની માગ કરી હતી. વિદ્યાર્થીઓનું કહેવું છે કે, આ શિક્ષક તેમને ખૂબ સારી રીતે ભણાવતા હતા અને તેમની બદલી થવાથી તેમના ભણતર પણ અસર પડશે. આ ઘટનાને પગલે સ્થાનિક તંત્રએ પરિસ્થિતિને થાળે પાડવા માટે દરમિયાનગીરી કરવી પડી હતી. વિદ્યાર્થીઓ અને વાલીઓની માંગણીઓને ધ્યાનમાં લઈને આ મામેલ યોગ્ય નિર્ણય લેવાય તેવી શક્યતા છે.